Brailvi Books
 |
جنت میں لے جانے والے اعمال |
(۴۴۲) ۔۔۔۔۔۔ حضرتِ سیدنا عبادہ بن صامت رضی اﷲ تعالی عنہ سے روایت ہے کہ اللہ عزوجل کے مَحبوب، دانائے غُیوب، مُنَزَّہ عَنِ الْعُیوب صلَّی اللہ تعالیٰ علیہ واٰلہٖ وسلّم نے فرمایا، ''جو اللہ عزوجل سے ملنا پسند کرتاہے اللہ اس سے ملنا پسند فرماتاہے اور جو اللہ عزوجل سے ملنا پسند نہیں کر تاہے اللہ عزوجل اس سے ملنا پسند نہیں فرماتا ہے۔ ''
(مسلم ، کتاب الذکر والدعاء ، رقم۲۶۸۳، ص۱۴۴۱)
(۴۴۳) ۔۔۔۔۔۔ ام المؤمنین حضرتِ سیدتنا عائشہ صدیقہ رضی اللہ تعالی عنہا سے روایت ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم نے فرمایا، ''جو اللہ عزوجل سے ملناپسند کرتاہے اللہ اس سے ملناپسند فرماتاہے اور جو اللہ عزوجل سے ملنا ناپسند کرتا ہے اللہ عزوجل اس سے ملنا ناپسند فرماتا ہے۔'' میں نے عرض کیا ،''یا رسول اﷲصلی اللہ علیہ وسلم! کیا اس سے مراد موت کو ناپسند کرنا ہے کیونکہ ہم میں سے ہر ایک موت کو ناپسند کرتاہے؟''
فرمایا،'' ایسا نہیں بلکہ مؤمن کو جب اللہ عزوجل کی رحمت اور اس کی رضا اور اس کی جنت کی بشارت دی جاتی ہے تو وہ اللہ عزوجل سے ملنا پسند کرتا ہے اور اللہ تعالیٰ اس سے ملنا پسند فرماتا ہے اور کافر کو جب اللہ عزوجل کے عذاب اور اس کی ناراضگی کی خبر دی جاتی ہے تو وہ اﷲ عزوجل سے ملنا نا پسند کرتا ہے اوراﷲ عزوجل اس سے ملنا ناپسند فرماتاہے ۔''