Brailvi Books
 |
جنت میں لے جانے والے اعمال |
(۴۰۸) ۔۔۔۔۔۔ حضرتِ سیدنا عثمان بن حنیف رضی اللہ تعالی عنہ سے روایت ہے کہ ایک نابیناشخص شہنشاہِ مدینہ،قرارِ قلب و سینہ، صاحبِ معطر پسینہ، باعثِ نُزولِ سکینہ، فیض گنجینہ صلَّی اللہ تعالیٰ علیہ واٰلہٖ وسلّم کی خدمت میں حاضر ہوئے اور عرض کیا ،''یا رسول اللہ صلی اللہ علیہ وسلم! اللہ تعالی سے دعا کیجئے کہ وہ میری بینائی واپس لَوٹادے۔'' تو سرورِکونین صلی اللہ تعالی علیہ وآلہ وسلم نے دریافت فرمایا، ''کیا میں تیرے لئے دعا کروں ؟ ''اس نے عرض کیا،''یا رسول اللہ صلی اللہ علیہ وسلم! میری بصارت کا چلا جانا مجھ پر بہت شاق گزرتاہے۔'' تو آپ نے ارشاد فرمایا، ''جاؤ !وضو کرواور پھر دو رکعتیں اداکرو ،اس کے بعد یہ دعامانگو،
'' اَللّٰھُمَّ اِنِّیْ اَسْئَلُکَ وَاَتَوَجَّہُ اِلَیْکَ بِنَبِیِّیِ مُحَمَّدٍ نَبِیِّ الرَّحْمَۃِ یَا مُحَمَّدُ اِنِّیْ اَتَوَجَّہُ اِلٰی رَبِّی بِکَ اَنْ یَّکْشِفَ لِیْ عَنْ بَصَرِی اَللّٰھُمَّ شَفِّعْہُ فِیَّ وَشَفَّعْنِیْ فِیْ نَفْسِی
اے اللہ عزوجل میں تجھ سے سوال کرتاہوں اور تیری بارگاہ میں اپنے نبی محمد صلی اللہ علیہ وسلم کے وسیلہ سے متوجہ ہوتا ہوں جو رحمت والے نبی ہیں ، یارسول اللہ صلی اللہ علیہ وسلم! میں آپ کے وسیلہ سے اپنے رب عزوجل کی بارگاہ میں عر ض کرتا ہوں کہ وہ میری بینائی سے پردہ ہٹادے، یااللہ عزوجل! رسول اللہ صلی اللہ علیہ وسلم کی سفارش میرے حق میں قبول فرمااور میری مراد پوری فرما۔''
راوی فرماتے ہیں کہ جب وہ شخص وہاں سے پلٹا تو اللہ عزوجل نے اس کی بینائی واپس لوٹا دی تھی۔''