Brailvi Books

(۳۹۵) ۔۔۔۔۔۔ حضرتِ سیدنا ابو اُمَامَہ رضی اللہ تعالی عنہ سے روایت ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم نے فرمایا،'' جواپنے گھر سے کسی فرض نماز کی ادا ئیگی کے لئے نکلا ،اس کا ثواب احرام باندھنے والے حاجی کی طرح ہے اور جو چاشت کی نماز ادا کرنے کے لئے نکلا اس کا ثواب عمرہ کرنے والے کی طرح ہے اور ایک نماز کے بعد دوسری نماز کا اس طرح انتظارکرنا کہ بیچ میں لغو بات نہ کی جائے تو اس کا نام علیین(یعنی اعلی درجے والوں) میں لکھا جاتاہے۔''

 (سنن ابی داؤد ، کتا ب التطوع ،باب صلوۃ الضحی ،رقم ۱۲۸۸ ، ج۲، ص ۴۱)

(۳۹۶) ۔۔۔۔۔۔ حضرتِ سیدنا ابو ہریرہ رضی اللہ تعالی عنہ سے روایت ہے کہ حضورِ پاک، صاحبِ لَولاک، سیّاحِ افلاک صلَّی اللہ تعالیٰ علیہ واٰلہٖ وسلّم نے فرمایا،'' جو چاشت کی دو رکعتیں پابندی سے اد ا کرتاہے اس کے گناہ معاف کردئیے جاتے ہیں اگر چہ سمند رکی جھاگ کے برابر ہوں ۔''

(سنن ابن ماجہ ،کتا ب امامۃ الصلوۃ والسنۃ فیھا،با ب ماجاء فی صلوۃ الضحی ،رقم ۱۳۸۲ ،ج ۲ ،ص ۱۵۳)

(۳۹۷) ۔۔۔۔۔۔ حضرتِ سیدنا عُقْبَہ بن عامر رضی اللہ تعالی عنہ فرماتے ہیں کہ میں سیِّدُ المبلغین، رَحْمَۃ لِّلْعٰلَمِیْن صلَّی اللہ تعالیٰ علیہ واٰلہٖ وسلّم کے ساتھ غزوہ تبو ک کیلئے گیا۔ ایک دن رحمتِ عالم صلی اللہ تعالی علیہ وآلہ وسلم بیٹھ کر اپنے صحا بہ کرام علیہم الرضوان سے گفتگو فرمارہے تھے کہ دورا ن گفتگوارشاد فرمایاکہ : جوشخص سورج کے بلند ہونے تک اپنی جگہ پر بیٹھا رہے پھر اٹھ کر کامل وضو کرے اور دو رکعتیں ادا کرے تو اس کے گناہ ایسے معاف کردئیے جائیں گے جیسے اس کی ماں نے اسے آج ہی جنا ہو ۔''

(مسند ابی یعلی ،رقم ۱۷۵۷ ،ج۲ ،ص ۱۸۰)

(۳۹۸) ۔۔۔۔۔۔ حضرتِ سیدنا ابواُمَامَہ رضی اللہ تعالی عنہ سے روایت ہے کہ اللہ عزوجل کے مَحبوب، دانائے غُیوب، مُنَزَّہ عَنِ الْعُیوب صلَّی اللہ تعالیٰ علیہ واٰلہٖ وسلّم نے فرمایا،'' جب سورج اپنے مطلع سے طلوع ہو کر ایسی حالت پر آجائے جیسے نمازعصر کے وقت سے غروب تک ہوتاہے ۔پھر جو شخص دو یا چار رکعتیں ادا کرے تو اس کے لئے اس دن کا ثواب ہے اور اس کے گناہ مٹادئیے جاتے ہیں، اگر اس دن اس کا انتقال ہوگیا تو جنت میں داخل ہوگا۔''

    (طبرانی کبیر ، رقم ۷۷۹۰، ج ۸، ص ۱۹۲)