Brailvi Books

(مسند احمد ، مسندا لمکیین / حدیث معاذبن انس الجھنی ، رقم ۱۵۶۲۳ ، ج ۵ ،ص ۳۱۰)

(۳۰۰)۔۔۔۔۔۔ ام المؤمنین حضرتِ سیدتنا عائشہ صدیقہ رضی اللہ تعالی عنہا فرماتی ہیں کہ میں نے شہنشاہِ مدینہ،قرارِ قلب و سینہ، صاحبِ معطر پسینہ، باعثِ نُزولِ سکینہ، فیض گنجینہ صلَّی اللہ تعالیٰ علیہ واٰلہٖ وسلّم کو فرماتے ہوئے سنا کہ'' جو نماز فجر ادا کرنے کے بعد اپنی جگہ بیٹھا رہے اور کوئی دنیوی بات نہ کرے اوراللہ عزوجل کا ذکر کرتا رہے پھر چاشت کی چار رکعتیں اداکرے تو گناہوں سے ایسا پاک وصاف ہوجائے گا جیساپاک اس دن تھا جس دن اس کی ماں نے اسے جنا تھاکہ اس پر کوئی گناہ نہ تھا۔''

(مسند ابی یعلی ، مسند عائشہ ، رقم ۴۳۴۸ ،ج۴ ، ص ۹)

(۳۰۱)۔۔۔۔۔۔ حضرتِ سیدنا امام حسن بن علی رضی اللہ تعالی عنہما فرماتے ہیں کہ میں نے نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم کو فرماتے ہوئے سنا کہ'' جس نے فجر کی نماز ادا کی پھر طلوع آفتاب تک اللہ عزوجل کا ذکر کرتا رہا پھر دو یا چار رکعتیں ادا کیں اس کے بدن کوجہنم کی آگ نہ چھو سکے گی۔''

(شعب الایمان ، با ب فی الصیام / فصل فیمن فطر صائم ، رقم ۳۹۵۷ ،ج ۳، ص ۴۲۰)

(۳۰۲)۔۔۔۔۔۔ حضرتِ سیدنا ابواُمَامَہ رضی اللہ تعالی عنہ سے بھی ایسی ہی ایک حدیث پاک مروی ہے مگر اس میں رکعتوں کا ذکر نہیں ہے ۔

    (طبرانی کبیر ، رقم ۷۷۴۱ ، ج ۸ ،ص ۱۷۸)

(۳۰۳)۔۔۔۔۔۔ حضرتِ سیدنا ابواُمَامَہ رضی اللہ تعالی عنہ سے روایت ہے کہ حضورِ پاک، صاحبِ لَولاک، سیّاحِ افلاک صلَّی اللہ تعالیٰ علیہ واٰلہٖ وسلّم نے فرمایا ''جو فجر کی نماز باجماعت ادا کرے پھر طلوع ِ شمس تک بیٹھ کر اللہ عزوجل کا ذکر کرتا رہے ،پھر کھڑا ہو کر دو رکعتیں اداکرے تو ایک حج اور عمرے کا ثواب لیکر لوٹے گا۔

''        (طبرانی کبیر ، رقم ۷۷۴۱ ، ج ۸ ،ص ۱۷۸)