ترجمۂ کنزالایمان :اے ایمان والوصبر کرو اور صبر میں دشمنوں سے آگے رہو اور سر حد پر اسلامی ملک کی نگہبانی کرو اور اللہ سے ڈرتے رہو اس امید پر کہ کامیاب ہو۔(پ 4، آل عمران: 200)
(۲۸۶)۔۔۔۔۔۔ حضرتِ سیدنا ابو ہریرہ رضی اللہ تعالی عنہ سے روایت ہے کہ نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَرصلَّی اللہ تعالیٰ علیہ واٰلہٖ وسلّم نے فرمایا ،''تم میں سے کوئی شخص اس وقت تک نماز میں ہی ہوتاہے جب تک نماز اسے روکے رکھتی ہے(یعنی وہ نماز کے انتظار میں ہوتا ہے)، اور اس کے اپنی جگہ سے اٹھنے یا گفتگوکرنے تک ملائکہ عرض کرتے رہتے ہیں،'' اے اللہ عزوجل! اس کی مغفر ت فرما اے اللہ عزوجل! اس پر رحم فرما ۔''
اور ایک روایت میں ہے کہ'' بندہ جب تک اپنی جگہ بیٹھ کر نماز کاانتظار کرتاہے نماز ہی میں ہوتا ہے اور ملائکہ اس کے اٹھنے یا محدِث ہونے تک اس کے لئے یہ دعا کرتے رہتے ہیں کہ'' اے اللہ! اس کی مغفرت فرما اے اللہ ! اس پر رحم فرما۔''عرض کیا گیا،'' حدث سے کیا مراد ہے ؟''ارشاد فرمایا،''بے آواز یا باآواز ریح خارج کرنا ۔''