 |
جنّت کی دوچابیاں |
یَطُوۡفُ عَلَیۡہِمْ وِلْدَانٌ مُّخَلَّدُوۡنَ ﴿ۙ۱۷﴾بِاَکْوَابٍ وَّ اَبَارِیۡقَ ۬ۙ وَکَاۡسٍ مِّنۡ مَّعِیۡنٍ ﴿ۙ۱۸﴾لَّا یُصَدَّعُوۡنَ عَنْہَا وَلَا یُنۡزِفُوۡنَ ﴿ۙ۱۹﴾
ترجمہ کنزالایمان :ان کے گر د لئے پھر یں گے ہمیشہ رہنے والے لڑکے کوزے اور آفتابے اور جام اور آنکھوں کے سامنے بہتی شراب کہ اس سے نہ انہیں درد سر ہو اور نہ ہوش میں فرق آئے۔''
(پ ۲۷ ،سورۃ الواقعہ:۱۷،۱۸،۱۹)
جنت کا موسم :
جنت میں دنیا کی مثل گرمی یا سردی کی شدت کا سامنا نہیں ہوگا بلکہ اس میں انتہائی خوشگوار اور معتدل موسم ہو گا ،قرآن حکیم میں ہے ،
لَا یَرَوْنَ فِیۡہَا شَمْسًا وَّ لَا زَمْہَرِیۡرًا ﴿ۚ۱۳﴾
ترجمہ کنزالایمان : نہ اس میں دھوپ دیکھیں گے نہ ٹھڑ (سخت سردی)۔''
(پ۲۹، سورۃالدھر: ۱۳ )
جنت کے درخت:
حضرت سیدناابوہریرہ رضی اللہ تعالی عنہ سے مروی ہے کہ رسول اللہ صلی اللہ تعالی علیہ وسلم نے ارشاد فرمایا:''جنت میں ہردرخت کا تنا سونے کا ہے ۔''
(ترمذی، کتاب صفۃ الجنۃ ،رقم الحدیث۲۵۳۳،ج۴، ص۲۳۶)
حضرتِ سیدنا براء بن عازب رضی اللہ تعالی عنہ اللہ عز وجل کے فرمان
وَ ذُلِّلَتْ قُطُوۡفُہَا تَذْلِیۡلًا ﴿۱۴﴾
ترجمہ کنزالایمان :اور اس کے گچھے جھکا کرنیچے کردیے گئے ہوں گے۔(پ۲۹،الدھر : ۱۴) '' کی تفسیر میں فرماتے ہیں کہ'' اہلِ جنت جنت کے پھل بیٹھے ہوئے اورلیٹ کر کھا سکیں گے۔''
(الترغیب والترھیب ،کتاب صفۃ الجنۃ والنار ، رقم ۶۱، ج۴، ص۱۱)