Brailvi Books

(8)۔۔۔۔۔۔حضرت سيدنا ابو اُمامہ رضی اللہ تعالیٰ عنہ ارشاد فرماتے ہيں کہ نبئ کریم ، رء ُوف رحیم صلَّی اللہ تعالیٰ علیہ وآلہ وسلَّم ايک مرتبہ سخت گرم دن ميں بقيع غرقدکی طرف تشريف لے گئے، صحابہ کرام علیہم الرضوان بھی آپ صلَّی اللہ تعالیٰ علیہ وآلہ وسلَّم کے پيچھے پيچھے چل دئيے جب آپ صلَّی اللہ تعالیٰ علیہ وآلہ وسلَّم نے جوتوں کی آواز سنی تو ٹھہر کر بيٹھ گئے يہاں تک کہ انہيں آگے جانے ديا پھر جب آپ صلَّی اللہ تعالیٰ علیہ وآلہ وسلَّم بقيع غرقَد پہنچ کر دو نئی قبروں کے پاس سے گزرے تو دریافت فرمایا :''آج تم نے يہاں کس کو دفن کيا ہے؟'' صحابہ کرام عليہم الرضوان نے عرض کی: ''فلاں، فلاں کو۔''پھر عرض کی : ''يارسول اللہ عزوجل وصلَّی اللہ تعالیٰ علیہ وآلہ وسلَّم! معاملہ کيا ہے؟'' تو آپ صلَّی اللہ تعالیٰ علیہ وآلہ وسلَّم نے ارشادفرمايا :''ان ميں سے ايک پيشاب سے نہ بچتا تھا جبکہ دوسرا چغلخوری کرتا تھا۔'' پھر آپ صلَّی اللہ تعالیٰ علیہ وآلہ وسلَّم نے ايک تر ٹہنی پکڑ کر اس کے دو ٹکڑے کئے اور قبر پر رکھ دئيے، صحابہ کرام علیہم الرضوان نے عرض کی :''يارسول اللہ عزوجل وصلَّی اللہ تعالیٰ علیہ وآلہ وسلَّم! آپ صلَّی اللہ تعالیٰ علیہ وآلہ وسلَّم نے ايسا کيوں کيا؟'' تو آپ صلَّی اللہ تعالیٰ علیہ وآلہ وسلَّم نے ارشاد فرمايا :''تا کہ ان کے عذاب ميں تخفيف ہو جائے۔'' صحابہ کرام علیہم الرضوان نے عرض کی :''انہيں کب تک عذاب ہوتارہے گا؟'' آپ صلَّی اللہ تعالیٰ علیہ وآلہ وسلَّم نے ارشاد فرمايا :''يہ غيب کی بات ہے جسے اللہ عزوجل ہی جانتا ہے اور اگر تمہارے دل منتشر نہ ہوتے اور گفتگو ميں زيادتی نہ کرتے تو تم بھی وہ سنتے جو ميں سنتا ہوں۔''