حضرت سیدنا عبداللہ بن مرزوق رضی اللہ تعالی عنہ پہلے پہل دنیا ہی میں مشغول رہا کرتے تھے۔ ایک دن انہوں نے شراب پی اور مدہوشی کی حالت میں مزامیر سننے میں مشغول رہے یہاں تک کہ ظہر ، عصر اور مغرب کی نماز بھی نہ پڑھ سکے ۔ حالانکہ ان کی کنیز ہر نماز کے لئے کہنے آتی رہی ۔ پھر جب نمازِعشاء کا وقت بھی نکلنے لگا تو وہ ایک انگارہ اٹھا لائی اور آپ کے پاؤں پر رکھ دیا ۔آپ شدتِ تکلیف سے تڑپ اٹھے اور پوچھا ،''یہ کیا ہے؟'' کنیز نے جواب دیا ،''یہ تو دنیا کی آگ ہے ،آخرت کی آگ کیسے برداشت ہو گی؟''یہ سن کر آپ بہت روئے اور نماز کے لئے کھڑے ہوگئے ۔ بعد میں اپنی دولت راہِ خدا عزوجل میں صدقہ کر کے یادِ الٰہی عزوجل میں مشغول ہوگئے ۔
