Brailvi Books
 |
حکایتیں اور نصیحتیں |
599 - 649
امیرالمؤمنین حضرتِ سیِّدُنا علی المرتضیٰ کَرَّمَ اللہُ تَعَالٰی وَجْہَہُ الْکَرِیْم سے مروی ہے کہ نبئ رحمت، شفیعِ امت صلَّی اللہ تعالیٰ علیہ وآلہ وسلَّم کا فرمانِ حق نشان ہے :''بے شک اللہ عَزَّوَجَلَّ نے تم پر ابوبکر،عمر ،عثمان اورعلی کی محبت کو فرض کر دیا ہے، جیسے نماز ،روزہ ، زکوٰۃ اور حج کو تم پر فرض کیا ہے تو جو ان میں سے کسی ایک سے بھی بغض رکھے اللہ عَزَّوَجَلَّ اس کی نمازقبول فرمائے گا، نہ زکوٰۃ،نہ روزہ اورنہ ہی حج۔ اور اسے قبرسے جہنم میں پھینک دیا جائے گا۔''
(فردوس الاخبارللدیلمی،باب الالف،الحدیث۶۱۹،ج ۱،ص۱0۱)
خلفاء ِ راشدین علیہم الرضوان کی عظمت و شان:
حضرتِ سیِّدُنا انس بن مالک ر ضی اللہ تعالیٰ عنہ سے مروی ہے، نور کے پیکر، تمام نبیوں کے سَرْوَر، دو جہاں کے تاجْوَر، سلطانِ بَحرو بَر صلَّی اللہ تعالیٰ علیہ وآلہ وسلَّم کا ارشادِ حقیقت بنیاد ہے: ''میرے حوض کے چار کونے ہیں: پہلے کونے پر ابوبکر ،دوسرے پرعمر ، تیسرے پر عثمان اور چوتھے پر علی ہوں گے ۔ جو ابوبکر سے محبت کرے اور عمر سے بغض رکھے اس کو ابوبکر سیراب نہیں کریں گے اور جو عمر سے محبت رکھے اور عثمان سے بغض رکھے اس کو عمرسیراب نہیں کریں گے اور جو عثمان سے محبت کرے اور علی سے بغض رکھے اس کو عثمان حوض سے نہیں پلائیں گے اور جو علی سے محبت کرے مگر عثمان سے بغض رکھے اس کو علی سیراب نہیں کریں گے تو جس نے ابوبکر سے محبت کی اس نے دین کو قائم کیااور جس نے عمر سے محبت کی وہ ایمان والوں میں لکھا جائے گا،اور جس نے عثمان سے محبت کی وہ نورِ مبین سے منور ہوا اور جس نے علی سے محبت کی تواس نے بھلائی کا کام کیا اور اللہ عَزَّوَجَلَّ بھلائی کرنے والوں کو پسند فرماتاہے۔اور جس نے ان تمام کے متعلق حسنِ ظن رکھا وہ مؤمن ہے اور جو بد گمانی کرے وہ منافق ہے۔''