Brailvi Books
 |
حکایتیں اور نصیحتیں |
منقول ہے کہ اللہ عزَّوَجَلَّ نے حضرتِ سیِّدُنا موسیٰ علٰی نبیناوعلیہ الصلٰوۃوالسلام کی طرف وحی فرمائی: ''کیا تم چاہتے ہو کہ بروزِ قیامت تمہاری نیکیاں تمام مخلو ق کی نیکیوں کے برابر ہوں؟''توانہوں نے عرض کی :''جی ہاں!اے میرے رب عَزَّوَجَلَّ!'' تو اللہ عزَّوَجَلَّ نے ارشاد فرمایا: '' مریضوں کی عیادت کر اور فقراء کے کپڑوں کا اہتمام کر۔'' پس حضرتِ سیِّدُنا موسیٰ علٰی نبینا وعلیہ الصلٰوۃ والسلام نے اپنے اوپر لازم کر لیا کہ ہر ماہ سات دن فقراء کے لباس کا اہتمام کرتے اور مریضوں کی عیادت فرماتے۔
حضرتِ سیِّدُنا عبد اللہ بن مبارَک رحمۃاللہ تعالیٰ علیہ فرماتے ہیں:'' فقر میں غنا کو ظاہر کرنا فقر ظاہر کرنے سے افضل ہے۔''فقرمیں چار چیزوں کا ہونا ضروری ہے:
منقول ہے کہ فقیر کے پاس فقرمیں کم از کم چار چیزوں کا ہونا ضروری ہے: (۱)۔۔۔۔۔۔ ایسا علم جو اسے مزیَّن کردے (۲)۔۔۔۔۔۔ ایسا تقوی جو اس کی حفاظت کرے (۳)۔۔۔۔۔۔ ایسا یقین جو اُسے خوش اخلاق بنا دے اور(۴)۔۔۔۔۔۔ ایسا ذکر جو اسے مانوس کرے۔
حضرتِ سیِّدُنا ابوحفص رحمۃاللہ تعالیٰ علیہ فرماتے ہیں: '' کسی کا فقر اس وقت تک صحیح نہیں ہو سکتاجب تک کہ وہ لینے سے زیادہ دینے کومحبوب نہ رکھے اور سخاوت اس چیز کا نام نہیں کہ مال پانے والا نہ پانے والے کو دے۔'' حضرتِ سیِّدُنا ابن جلال رحمۃ اللہ تعالیٰ علیہ فرماتے ہیں: ''اگر عاجزی وانکساری قابلِ فخر شئے نہ ہوتی تو فقیر کو حکم دیاجاتاکہ وہ متکبرانہ چال چلے۔''