Brailvi Books

میٹھے میٹھے اسلامی بھائیو!معلوم ہوا غیبت سے مَعاذَاللہ عَزَّوَجَلَّ ایمان ضائِع ہو جانے کا خوف ہے۔ آہ!جس کا ایمان برباد ہو گیا خدا کی قسم!وہ کہیں کا نہ رہے گا، جب کُفر پر مرنے والا بد نصیب آدمی قَبْر میں پہنچے گا تو مُنکرنکیر کے سُوالات کے دُرُست جوابات نہ دے سکے گا اورپھر خوفناک عذابات کا سلسلہ شروع ہو جائے گا ۔ چُنانچِہ دعوتِ اسلامی کے اِشاعتی ادارے مکتبۃُ الْمدینہ کی مطبوعہ 1250 صَفحات پر مشتمل کتاب ، ''بہارِ شریعت''جلد اوّل صَفْحَہ 110 تا111پرصدرُ الشَّریعہ،بدرُ الطَّریقہ حضرتِ علامہ مولیٰنامفتی محمد امجد علی اعظمی علیہ رحمۃ اللہ القوی فرماتے ہیں:اس وَقت ایک پکارنے والا آسمان سے پکارے گا کہ یہ جھوٹا ہے، اس کے لیے آگ کا بچھونا بچھاؤ اور آگ کا لباس پہناؤ اور جہنَّم کی طرف ایک دروازہ کھول دو۔ اس کی گرمی اورلَپَٹ اس کو پہنچے گی اور اس پر عذاب دینے کے لیے دو فرِشتے مقرِّر ہوں گے، جو اندھے اور بہرے ہوں گے، ان کے ساتھ لوہے کاگُرز ہو گا کہ پہاڑ پر اگر مارا جائے تو خاک ہو جائے، اُس ہتھوڑے سے اُس کو مارتے رہیں گے۔ نیز سانپ اور بچھو اسے عذاب پہنچاتے رہیں گے، نیز اعمال اپنے مناسِب شکل پر متشکل(مُتَشَ کْ۔ کِلْ )ہو کر کتّا یا بھیڑیا یا اور شکل کے بن کر اُس کو ایذا پہنچائیں گے۔