Brailvi Books

میٹھے میٹھے اسلامی بھائیو!ہر ذی شُعُور اندازہ لگا سکتا ہے کہ آج کل جب تمام ہی برائیاں عُروجِ بام پر ہیں تو پھر'' غیبت''کیوں پیچھے رہے گی!خیر اس کا مطلب ہرگز یہ نہیں کہ ہر ہر فرد لازِمی طور پر غیبت میں لگا ہوا ہے، اللہ عَزَّوَجَلَّ کے نیک بندوں سے ہرگز دنیا خالی نہیں۔ تو جو واقِعی نیک بندے ہوں اُن کی صحبت بابَرَکت سے ضَرور فیض حاصِل کرنا چاہے اور جو بظاہر مذہبی وَضع قَطْع رکھتے ہوں اور دیکھنے میں ''نیک صورت''ہوں مگر غیبتوں ، چغلیوں ، بدگمانیوں،تہمتوں وغیرہ وغیرہ گناہوں کی گندگیوں اور غلاظتوں میں لتھڑے رہتے ہوں ان کی مجلسوں( بیٹھکوں) سے دُور رہنے ہی میں سلامتی بلکہ ایسوں سے دور رہنا شرعاً بھی ضَروری ہے۔دعوتِ اسلامی کے اِشاعتی ادارے مکتبۃُ المدینہ کی مطبوعہ 312 صَفحات پر مشتمل کتاب ، ''بہارِ شریعت ''حصّہ 16 صَفْحَہ164پر ہے:عِمْرَان بن حِطَّان سے روایت کی، کہتے ہیں:میں(حضرتِ سیِّدُنا)ابوذَرّ (غِفاری)رضی اﷲ تعالیٰ عنہ کے پاس گیا، انھیں کالی کملی اَوڑھے ہوئے مسجِد میں تنہا بیٹھا ہوا دیکھا۔ میں نے کہا:ابوذر!یہ تنہائی کیسی؟ انہوں نے کہا:میں نے رسولُ اﷲ(عَزَّوَجَلَّ و )صلَّی اللہ تعالیٰ علیہ وسلَّم کو فرماتے سنا:تنہائی اچّھی ہے بُرے ہم نشین سے اور ہم نشینِ صالح(یعنی نیک رفیق)تنہائی سے بہتر ہے اور اچھی بات بولنا خاموشی سے بہتر ہے اور بری بات بولنے سے چُپ رہنا بہتر ہے۔