Brailvi Books

طبیب یا عامِل کو بہ نیّتِ حُصُولِ علاج عُیوب بتانے میں حَرَج نہیں۔البتّہ فردِ مُعَیَّن کا تذکِرہ کئے بِغیر کام چل جاتا ہو تو چلا لیجئے مَثَلاً ''میرا بیٹا شراب پیتا ہے''کہنے کے بجائے یوں کہہ دیجئے کہ ''میرا ایک رشتے دار شراب پیتا ہے'' اگر نام وغیرہ بتانا ضَروری ہو یا خود اپنی ہی خامیاں بیان کئے بِغیر چارہ نہ ہو تو یہ احتیاط ضَروری ہے کہ اُس طبیب یا عامل ہی کو بتایا جائے بِلا حاجت کوئی بھی دوسرا فرد وہ باتیں سننے یا جاننے نہ پائے۔بڑے ڈاکٹر عُمُوماً اپنے کمرے میں الگ بلا کر مریض سے احوال سنتے ہیں مگر نہ جانے کیوں ان کی اکثریت اُس موقع پر تعاون کیلئے بے پردہ عورت ساتھ رکھنے کا گناہ کرتی ہے! چند بار مجھے جب ایسا اِتِّفاق ہوا ہے تو رازداری کی گفتگو نہ ہونے کے باوجُود نگاہوں کی حفاظت کی خاطِر درخواست کر کے عورت کو باہر کمرے سے بھجوا دیاہے۔ ہر ایک کو حکمِ شریعت پر عمل کرنا چاہئے۔