Brailvi Books

لنگڑے کی نقّالی

کسی لنگڑے کی نَقّالی میں لنگڑا کرچلنا نیز کسی مخصوص مسلمان کی کسی بھی خامی کی نَقْل اتارنا غیبت ہے بلکہ یہ زَبان سے غیبت کرنے سے بھی زیادہ بُرا ہے۔کیونکہ نَقل کرنے میں پوری تصویر کَشی اور بات کو سمجھانا پایا جاتا ہے جبکہ کہنے میں وہ بات نہیں ہوتی۔

نام لئے بِغیر غیبت کرنا

نام لئے بِغیر غیبت کرنا گناہ نہیں ، ہاں اگر نام تو نہ لیا مگر جس کو کہہ رہا ہے وہ سمجھ رہا ہے کہ کس کے بارے میں بات ہو رہی ہے تواب غیبت ہے۔

منہ پر بھی کہہ سکتا ہوں!

غیبت کرنے والے کا یہ سمجھنا یا کہنا کہ میں اس کے مُنہ پر بھی کہہ سکتا ہوں ، اِس کو غیبت کے گناہ سے نہیں بچا سکتا کیوں کہ غیبت کے حرام ہونے کی اصل وجہ اِیذاء ِ مسلم ہے اورمُنہ پر کہنے سے اُس کا دل زیادہ دُکھے گا تو یہ اور بھی بڑا گناہ ہوا۔جس کی بُرائی کی گئی وہ ہنسنے لگا اس کا مطلب ہر گز یہ نہیں کہ وہ اپنی برائی سن کر جھوم اُٹھا ہے ، فِطرۃً عام آدمی اپنی تعری ف سن کر ہی خوش ہوتا ہے اپنی مَذَمَّت سن کر کوئی خوش نہیں ہوتا لہٰذا اپنی مَذَمَّت سُن کر ہنسنایہ'' کِھسیانی ہنسی''ہوتی ہے کہ آدمی مُرُوّت میں یااپنی جِھینپ مٹانے کیلئے ایسے موقع پر ہنستا ہے حالانکہ اندرونی طور پر اُس کا دل جل رہا ہوتا ہے ۔