Brailvi Books

لولے لنگڑے کی غیبت

تابِعی بُزُرگ حضرت سیِّدُنامُعاوِیہ بن قُرَّہ رحمۃ اللہ تعالیٰ علیہ فرماتے ہیں:''اگر تمہارے پاس سے کوئی لُنجا (یعنی لولا یا لنگڑا)گزرے اور تم اُس کے لُنجا پن کے عیب کا تذکرہ کرو تو یہ بھی غیبت ہے۔''

 (تفسیردُرّ مَنثورج۷ ص ۵۷۱)

معلوم ہوا کہ کسی لُنجے کو بھی بِلا اجازتِ شرعی پیٹھ پیچھے لُنجا کہنا غیبت ہے اِسی طرح کسی کو * لنگڑا * گنجا * اندھا *کانا *لُولا *تُتلا *ہکلا *گونگا*بہرا* کُبڑا وغیرہ کہنا بھی غیبت ہے۔

لباس کی خامی بتانا بھی غیبت ہے

اُمّ الْمُؤمِنِین حضرتِ سَیِّدَتُنا عائِشہ صِدّیقہ رضی اللہ تعالیٰ عنہاارشاد فرماتی ہیں کہ ایک مرتبہ میں نبیِّ پاک، صاحِب لَولاک، سیّاحِ اَفلاک صلَّی اللہ تعالیٰ علیہ واٰلہٖ وسلَّم کی خدمت میں حاضِر تھی، میں نے ایک عورت کے بارے میں کہا:

اِ نَّ ھٰذِہٖ لَطَوِیْلَۃُ الذَّیْلِ

یعنی یہ لمبے دامن والی ہے۔ تو آپ صلَّی اللہ تعالیٰ علیہ واٰلہٖ وسلَّم نے ارشاد فرمایا:

اِلْفَظِیْ اِلْفَظِیْ

یعنی جو کچھ تیرے منہ میں ہے نکال پھینک۔ تو میں نے منہ سے گوشت کا ٹکڑا نکال کر پھینکا۔

                 (الصّمت مع موسوعۃ ابن اَبِی الدُّنْیا ج۷ص۱۴۵حدیث ۲۱۶ )