Brailvi Books

بسم اللہ کہنا کب کفر ہے

حرام وناجائزکام سے قبل بِسم اللہ شریف ہرگز،ہرگز،ہرگزنہ پڑھی جائے، حرامِ قَطعی کام سے پہلے بسم اللہ پڑھنا کفر ہے چُنانچِہ''فتاوٰی عالمگیری ''میں ہے:شراب پیتے وَقْت،زِناکرتے وَقْت یا جُواکھیلتے وَقْت بسم اللہ کہناکُفْر ہے۔

(فتاوٰی عالَمگیری ج ۲ ص ۳ ۲۷)

کب ذِکرُ اللہ عَزَّوَجَلَّ کرنا گناہ ہے!

یاد رکھئے!زَبان  سے ذکر و دُرُود باعثِ اجر و ثواب بھی ہے اور بعض صورَتوں میں ممنوع بھی مَثَلاً''مکتبۃُ الْمدینہ کی مطبوعہ ''بہارِ شریعت''جلد اوّل صَفْحَہ533 پرہے: گاہک کو سودا دکھاتے وَقت تاجِر کا اِس غَرَ ض سے دُرُود شریف پڑھنا یا سبحٰن اللہ کہنا کہ اس چیز کی عُمدَگی خریدار پر ظاہرکرے ناجائز ہے۔ یونہی کسی بڑے کو دیکھ کر اس نیّت سے دُرُود شریف پڑھنا کہ لوگو ں کو اس کے آنے کی خبر ہوجائے تا کہ اس کی تعظیم کو اٹھیں او رجگہ چھوڑ دیں ناجائز ہے۔

(رَدُّالْمُحتار ج۲ ص۲۸۱)

استقبال کیلئے ''اللہ اللہ''کی صدائیں بلند کرنا

میٹھے میٹھے اسلامی بھائیو!مذکورہ جُزیئے کے پیشِ نظر میں(سگِ مدینہ عفی عنہ )اکثر اسلامی بھائیوں کو سمجھاتا رہتا ہوں کہ میری آمد پر ''اللہ اللہ''کی صدائیں بلند نہ کیا کریں کیونکہ بظاہر یہاں ذکر اللہ نہیں استِقبال مقصود ہوتا ہے ۔