Brailvi Books

    اپنے ہاتھ پاؤں کا اس طرح سے محاسبہ کریں کہ ،''اے بندے ! رب العالمین جل جلالہ نے تجھے ہاتھ اور پاؤں کی سلامتی کا تحفہ عطا فرمایا جن کی مدد سے تو اپنے بے شمار معمولاتِ زندگی پورے کرتا ہے ،۔۔۔۔۔۔ ذرا غور کر ! تو نے آج تک انہیں کن مقاصد میں استعمال کیا ؟۔۔۔۔۔۔ کیا تو ان کی مدد سے نامحرم عورتوں کو چھوتا رہا،اُن سے مصافحہ کرتا رہا، امردوں سے بشہوت ہنسی مذاق کرتا رہا،داڑھی مونڈھتا رہا، مسلمانوں پر ظلم ڈھاتا رہا، ان کو قتل تک کردیتا رہا ،ایسی جگہوں پر جانے کا شوقین رہا جہاں کثرت سے گناہ ہوتے ہوں،ناچ رنگ کرتا رہا ، تاش،شطرنج اور لُوڈُوجیسے کھیل کھیلتا رہا،پتنگ اڑاتا رہا،پتنگ اور ڈور لوٹتا رہا،چوری کرتا رہا،ڈکیتی مارتارہااوررشوت لیتا رہا....یاپھر.... تم نے قرآن پاک کو چھونے ،نماز کی ادائیگی کے لئے جانے، نیک اجتماع میں شرکت کرنے، مدنی قافلہ میں سفر کرنے، تبرکات کو چومنے ، نیکی کی دعوت کے لئے جانے ، کسی مصیبت زدہ کی مدد کرنے ، ماں باپ کے پاؤں وغیرہ دابنے اورحقوق العباد پورے کرنے میں ان سے مدد لی ؟۔۔۔۔۔۔

    اے بندے یاد رکھ ! قیامت کے دن یہی ہاتھ اور پاؤں، جو آج تیرے بدن کا حصہ ہیں ، تیرے خلاف بارگاہِ خداوندی میں گواہی دیں گے کہ ہاں اس شخص نے فلاں فلاں گناہ کا کام کیا تھا ؟۔۔۔۔۔۔ وہ وقت کیسی بے بسی کا ہوگا جب تیرے اعضاء بھی تیرا ساتھ چھوڑ جائیں گے ،۔۔۔۔۔۔ ابھی بھی وقت ہے سنبھل جا، توبہ کر لے اور اپنے ہاتھ پاؤں کو غلط کاموں سے بچانے کے لئے ان کو قفل ِ مدینہ لگا دے ۔اللہ تعالیٰ تیرا حامیئ وناصر ہو۔ آمین بجاہ النبی الامین صلی اللہ تعالی علیہ والہ وسلم ۔۔۔۔۔۔''