Brailvi Books

بہارِشریعت حصّہ نہم (9)

416 - 466

یاکچھ جواب نہیں دیتا تو ان سب صورتوں میں قطع نہیں مگر اقرار سے رجوع کی تو تاوان لازم ہے۔ (1)(درمختار)

    مسئلہ ۵: اقرار کرکے بھاگ گیاتو قطع نہیں کہ بھاگنا بمنزلہ رجوع کے ہے ہاں تاوان لازم ہے۔ اور گواہوں سے ثابت ہو تو قطع ہے اگرچہ بھاگ جائے اگرچہ حکم سنانے سے پہلے بھاگا ہو البتہ اگر بہت دنوں میں گرفتار ہوا تو تمادی عارض ہوگئی مگر تاوان لازم ہے۔(2) (درمختار) 

    مسئلہ ۶: مدعی گواہ نہ پیش کرسکا چور پر حلف (3) رکھا اوس نے حلف لینے سے انکار کیاتو تاوان دلایاجائے مگر قطع نہیں۔ (4)(درمختار) 

    مسئلہ ۷: چور کو مار پیٹ کر اقرار کرانا جائز ہے کہ یہ صورت نہ ہو تو گواہوں سے چوری کا ثبوت بہت مشکل ہے۔ (5)(درمختار) 

    مسئلہ ۸: ہاتھ کاٹنے کا قاضی نے حکم دیدیااب وہ مدعی کہتا ہے کہ یہ مال اوسی کاہے یامیں نے اوس کے پاس اما نۃً رکھا تھا یاکہتا ہے کہ گواہوں نے جھوٹی گواہی دی یااوس نے غلط اقرار کیاتو اب ہاتھ نہیں کاٹاجاسکتا۔ (6)(درمختار) 

    مسئلہ ۹: گواہوں کے بیان میں اختلاف ہوا ایک کہتا ہے کہ فلاں قسم کاکپڑا تھا دوسرا کہتا ہے فلاں قسم کا تھا تو قطع نہیں ۔(7) (بحر) اقرار وشہادت کے جزئیات کثیرہیں چونکہ یہاں حدود جاری نہیں ہیں لہٰذا بیان کرنے کی ضرورت نہیں۔ 

    مسئلہ ۱۰: ہاتھ کاٹنے کے وقت مدعی اور گواہوں کا حاضر ہونا ضرور نہیں(8) بلکہ اگر غائب ہوں یامر گئے ہوں جب بھی ہاتھ کاٹ دیاجائے گا۔ (9)(درمختار)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

1۔۔۔۔۔۔ ''الدرالمختار''،کتاب السرقۃ،ج۶،،ص۱۳۹.

2۔۔۔۔۔۔''الدرالمختار''،کتاب السرقۃ،ج۶،ص۱۴۰.

3۔۔۔۔۔۔قسم اٹھانا۔

4۔۔۔۔۔۔''الدرالمختار''،کتاب السرقۃ،ج۶،ص۱۴۰.

5۔۔۔۔۔۔ المرجع السابق،ص۱۴۱.

6۔۔۔۔۔۔المرجع السابق،ص۱۴۳.

7۔۔۔۔۔۔''البحرالرائق''،کتاب السرقۃ،ج۵،ص۸۸.