Brailvi Books

بہارِشریعت حصّہ نہم (9)

304 - 466

اور اگر قسم کھلانا مقصود ہے یا نہ خودکھانا مقصودہے نہ کھلانا تو قسم نہیں یعنی اگر دوسرے نے اوس کام کو نہ کیا تو کسی پر کفارہ نہیں۔(1) (عالمگیری) 

    مسئلہ ۲۲: ایک نے دوسرے سے کہا خدا کی قسم تمھیں یہ کام کرنا ہوگا خدا کی قسم تمھیں یہ کام کرنا ہوگا دوسرے نے کہا ہاں اگر پہلے کا مقصود قسم کھاناہے اور دوسرے کا بھی ہاں کہنے سے قسم کھانا مقصود ہے تو دونوں کی قسم ہوگئی اور اگر پہلے کا مقصود قسم کھلانا ہے اور دوسرے کا قسم کھانا تو دوسرے کی قسم ہوگئی اور اگر پہلے کا مقصود قسم کِھلا نا ہے اور دوسرے کا مقصود ہاں کہنے سے قسم کھانا نہیں بلکہ وعدہ کرنا ہے تو کسی کی قسم نہ ہوئی۔(2) (عالمگیری) 

    مسئلہ ۲۳: ایک نے دوسرے سے کہاخدا کی قسم میں تمھارے یہاں دعوت میں نہیں آؤنگا تیسرے نے کہا کیا میرے یہاں بھی نہ آؤگے اوس نے کہا ہاں تو یہ ہاں کہنا بھی قسم ہے یعنی اس تیسرے کے یہاں جانے سے بھی قسم ٹوٹ جائے گی۔ (3)(عالمگیری)

کفارہ کا بیان

    اﷲعزوجل فرماتاہے:

 (لَا یُؤَاخِذُکُمُ اللہُ بِاللَّغْوِ فِیۡۤ اَیۡمَانِکُمْ وَلٰکِنۡ یُّؤَاخِذُکُمۡ بِمَا کَسَبَتْ قُلُوۡبُکُمْ ؕ وَاللہُ غَفُوۡرٌ حَلِیۡمٌ ﴿۲۲۵﴾ (4)

اﷲ (عزوجل) ایسی قسموں میں تم سے مؤاخذہ نہیں کرتا جو غلط فہمی سے ہوجائیں ہاں اون پر گرفت کرتاہے جو تمھارے دلوں نے کام کیے اور اﷲ (عزوجل) بخشنے والا، حلم والا ہے۔ اور فرماتا ہے :

( قَدْ فَرَضَ اللہُ لَکُمْ تَحِلَّۃَ اَیۡمَانِکُمْ ۚ وَ اللہُ مَوْلٰىکُمْ ۚ وَ ہُوَ الْعَلِیۡمُ الْحَکِیۡمُ ﴿۲﴾ (5)

بیشک اﷲ (عزوجل) نے تمھاری قسموں کا کفارہ مقرر کیا ہے اور اﷲ (عزوجل) تمھارا مولیٰ ہے اور وہ علم والا اور حکمت والا ہے۔ اور فرماتا ہے:

(لَا یُؤَاخِذُکُمُ اللہُ بِاللَّغْوِ فِیۡۤ اَیۡمَانِکُمْ وَلٰکِنۡ یُّؤَاخِذُکُمۡ بِمَا عَقَّدۡتُّمُ الۡاَیۡمَانَ ۚ فَکَفَّارَتُہٗۤ اِطْعَامُ عَشَرَۃِ مَسٰکِیۡنَ مِنْ اَوْسَطِ مَا تُطْعِمُوۡنَ اَہۡلِیۡکُمْ اَوْ کِسْوَتُہُمْ اَوْ تَحْرِیۡرُ رَقَبَۃٍ ؕ فَمَنۡ لَّمْ یَجِدْ فَصِیَامُ ثَلٰثَۃِ اَیَّامٍ ؕ ذٰلِکَ کَفَّارَۃُ اَیۡمَانِکُمْ اِذَا حَلَفْتُمْ ؕ وَاحْفَظُوۡۤا اَیۡمَانَکُمْ ؕ کَذٰلِکَ یُبَیِّنُ اللہُ لَکُمْ اٰیٰتِہٖ لَعَلَّکُمْ تَشْکُرُوۡنَ ﴿۸۹﴾ ) (6)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 1۔۔۔۔۔۔''الفتاوی الھندیۃ''،کتاب الأیمان ، الباب الثانی فیما یکون یمینًا ...إلخ ، الفصل الاول ،ج۲،ص۶۰. 2۔۔۔۔۔۔المرجع السابق. 3۔۔۔۔۔۔المرجع السابق. 4۔۔۔۔۔۔پ۲،البقرۃ: ۲۲۵. 5۔۔۔۔۔۔پ۲۸،التحریم : ۲. 6۔۔۔۔۔۔پ۷،المآئدہ:۸۹.