Brailvi Books

    حدیث ۱۸: ابو داود نے براء رضی اللہ تعالٰی عنہ سے روایت کی، کہ جب ابوبکر صدیق رضی اللہ تعالٰی عنہ شروع شروع مدینہ میں آئے تھے میں ان کے ساتھ ان کے یہاں گیا۔ حضرت عائشہ رضی اللہ تعالٰی عنہا بخار میں لیٹی ہوئی تھیں، حضرت ابوبکر ان کے پاس گئے اور پوچھا بیٹی کیسی ہو اور ان کے رخسارہ پر بوسہ دیا۔ (1) 

    حدیث ۱۹: ترمذی نے صفوان بن عسال رضی اللہ تعالٰی عنہ سے روایت کی، کہ دو ۲ یہودی حضور (صلَّی اللہ تعالٰی علیہ واٰلہٖ وسلَّم) کی خدمت میں حاضر ہوئے اور یہ سوال کیا کہ کھلی ہوئی نو ۹ نشانیاں کیا ہیں؟ حضور (صلَّی اللہ تعالٰی علیہ واٰلہٖ وسلَّم)نے فرمایا:!اﷲ(عزوجل)کے ساتھ کسی کو شریک نہ کرو۔ (1) اور چوری نہ کرو۔ (2) اورزنانہ کرو۔ (3) اور جس جان کو اﷲ(عزوجل)نے حرام کیا ہے اسے ناحق قتل نہ کرو۔ (4) اور جوجرم سے بری ہو اسے بادشاہ کے پاس قتل کے لیے نہ لے جاؤ۔ (5) اور جادو نہ کرو۔ (6) اور سود نہ کھاؤ۔ (7) اور عفیفہ (2)پر زنا کی تہمت نہ دھرو۔ (اور لڑائی کے دن مونھ پھیر کر نہ بھاگو اورخاص تم یہودی ہفتہ کے متعلق حد سے تجاوز نہ کرو۔''جب حضور (صلَّی اللہ تعالٰی علیہ واٰلہٖ وسلَّم)نے یہ فرمایا تو انھوں نے حضور(صلَّی اللہ تعالٰی علیہ واٰلہٖ وسلَّم)کے ہاتھوں اور قدموں کو بوسہ دیا۔(3)

    حدیث ۲۰: ابو داود نے عبداﷲ بن عمر رضی اللہ تعالٰی عنہما سے روایت کی کہتے ہیں کہ ہم حضور (صلَّی اللہ تعالٰی علیہ واٰلہٖ وسلَّم)کے قریب گئے اور ہاتھ کو بوسہ دیا۔ (4) 

    حدیث ۲۱: صحیح بخاری و مسلم میں ابوسعید خدری رضی اللہ تعالٰی عنہ سے مروی، کہ جب بنی قریظہ(5)اپنے قلعہ سے سعد بن معاذ رضی اللہ تعالٰی عنہ کے حکم پر اترے حضور (صلَّی اللہ تعالٰی علیہ واٰلہٖ وسلَّم)نے سعدرضی اللہ تعالٰی عنہ کے پاس آدمی بھیجا اور وہ وہاں سے قریب میں تھے۔ جب مسجد کے قریب آگئے، حضور(صلَّی اللہ تعالٰی علیہ واٰلہٖ وسلَّم) نے انصار سے فرمایا:''اپنے سردار کے پاس اٹھ کر جاؤ۔''(6)