مسئلہ۱۶: حمام کی اُجرت جائز ہے اگرچہ یہاں یہ متعین نہیں ہوتا کہ کتنا پانی صرف کریگا اور کتنی دیر تک حمام میں ٹھہرے گا۔ ہاں اگر حمام میں دوسروں کے سامنے اپنے ستر کو کھولے جیساکہ عموماًحمام میں ایسا ہوتا ہے یا خود اپنا ستر نہیں کھولا تو دوسرو ں کے ستر پر نظر پڑتی ہے اس وجہ سے حمام میں جانا منع ہے خصوصاًعورتوں کواس میں جانے سے بہت زیادہ احتیاط چاہيے اور اگر نہ اپنا سترکھولے نہ دوسرے کے ستر کی طرف نظر کرے تو حمام میں جانے کی ممانعت نہیں۔ (1)(ہدایہ،درمختار،ردالمحتار)
مسئلہ۱۷: حجامت یعنی پچھنے لگوانا جائز ہے اور پچھنے کی اُجرت دینا لینا بھی جائز ہے پچھنے لگانے والے کے ليے وہ اُجرت حلال ہے اگرچہ اُس کو خون نکالنا پڑتا ہے اور کبھی خون سے آلودہ بھی ہوجاتا ہے مگر چونکہ حضور اقدس صلی اللہ تعالٰی علیہ وسلَّم نے خود پچھنے لگوائے اور لگانے والے کو اُجرت بھی دی معلوم ہواکہ اس اُجرت میں خباثت (2)نہیں۔(3) (ہدایہ)
مسئلہ ۱۸: نر جانور کو جفتی کرنے کے ليے اُجرت پر دینا ناجائز ہے اور اُجرت بھی لینا ناجائز۔(4) (ہدایہ)
مسئلہ ۱۹: گناہ کے کام پر اجارہ ناجائز ہے مثلاً نوحہ کرنے والی(5)کو اُجرت پر رکھا کہ وہ نوحہ کرے گی جس کی یہ مزدوری دی جائے گی۔ گانے بجانے کے ليے اجیرکیا(6)کہ وہ اتنی دیر تک گائے گا اور اُس کویہ اُجرت دی جائے گی۔ ملاہی یعنی لہو و لعب پراجارہ بھی ناجائز ہے۔ گانا یا باجا سکھانے کے ليے نوکر رکھتے ہیں یہ بھی ناجائز ہے۔ (7)(درمختار، عالمگیری) ان صورتوں میں اُجرت لینا بھی حرام ہے اور لے لی ہوتو واپس کرے اور معلوم نہ رہا کہ کس سے اُجرت لی تھی تو اُسے صدقہ کردے کہ خبیث مال کا یہی حکم ہے۔ (8)(بحر)