مسئلہ ۲: شرکتِ ملک ميں ہر ایک اپنے حصہ ميں تَصَرُّف(1) کرسکتا ہے اور دوسرے کے حصہ ميں بمنزلہ اجنبی(2)ہے، لہٰذا اپنا حصہ بیع کرسکتا ہے اس ميں شریک سے اجازت لینے کی ضرورت نہیں اُسے اختيار ہے شریک کے ہاتھ بیع کرے یا دوسرے کے ہاتھ مگر شرکت اگر اِس طرح ہوئی کہ اصل ميں شرکت نہ تھی مگر دونوں نے اپنی چیزیں ملادیں یا دونوں کی چیزیں مل گئیں اور غیر شریک کے ہاتھ بیچناچاہتا ہے تو شریک سے اجازت لینی پڑے گی یا اصل ميں شرکت ہے مگر بیع کرنے ميں شریک کو ضرر(3) ہوتا ہے تو بغیر اجازتِ شریک غیر شریک کے ہاتھ بیع نہیں کرسکتا مثلاًمکان یا درخت یا زراعت مشترک ہے تو بغیر اجازت بیع نہیں کرسکتا کہ مشتری تقسیم کرانا چاہے گا اور تقسیم ميں شریک کا نقصان ہے ہاں اگر زراعت طیار ہے یا درخت کاٹنے کے لائق ہوگیااور پھلدار درخت نہیں ہے تو اب اجازت کی ضرورت نہیں کہ اب کٹوانے ميں کسی کا نقصان نہیں۔(4) (درمختار وغیرہ)
مسئلہ ۳: مشترک چیز اگر قابل قسمت(5)نہ ہو جیسے حمام،چکی،غلام،چوپایہ اسکی بیع بغیر اجازت بھی جائز ہے۔(6) (درمختار)