جب بھی کسی اِسلامی بھائی کے بارے میں دِل میں بدگُمانی آئے تو اس کے لئے دُعائے خیر کیجئے اور اس کی عزت واِکرام میں اضافہ کردیجئے ۔ حجۃالاِسلام اِمام محمد غزالی علیہ رحمۃاللہ الوالی (اَ لْمُتَوَفّٰی۵۰۵ھ)ارشاد فرماتے ہیں :'' جب تمہارے دِل میں کسی مسلمان کے بارے میں بدگُمانی آئے توتمہیں چاہے اس کی رعایت میں اضافہ کردو اور اس کے لئے دُعائے خیر کرو ، کیونکہ یہ چیز شیطان کو غصہ دِلاتی ہے اور اسے تم سے دُور بھگاتی ہے ۔شیطان دوبارہ تمہارے دِل میں براگُمان نہیں ڈالے گا کہ کہیں تم پھر سے اپنے بھائی کی رعایت اور اس کے لئے دُعائے خیر میں مشغول نہ ہوجاؤ۔''(احیاء علوم الدین ، کتاب آفات اللسان،ج۳،ص۱۸۷)
