Brailvi Books

خداعزوجل کے لئے حمدہے کہ اس نے میری موت کسی مرد مسلمان کے ہاتھ سے نہیں بنائی۔پھر لوگ آپ رضی اللہ تعالیٰ عنہ کو اٹھا کر مکان پر لائے اور آپ رضی اللہ تعالیٰ عنہ کو کھجور کا شربت پلایا گیا تو وہ شکم سے باہر نکل پڑا۔ پھر دودھ پلایا گیا تو وہ بھی شکم کے راستہ باہر نکل آیا۔ پھر طبیب نے کہہ دیا کہ امیر المومنین!رضی اللہ تعالیٰ عنہ اب آپ رضی اللہ تعالیٰ عنہ وصیت کردیں کیونکہ اب آپ رضی اللہ تعالیٰ عنہ کے بچنے کی کوئی امید نہیں ہے۔

    مکان آدمیوں سے بھرا ہوا تھا اور لوگ آپ رضی اللہ تعالیٰ عنہ کی مدح و ثنا کررہے تھے۔آپ رضی اللہ تعالیٰ عنہ نے سُن کر فرمایا کہ میری تو یہی تمنا ہے کہ میرا دورِ خلافت برابر سرابر ہوجائے ۔ نہ اس کا مجھے کوئی ثواب ملے نہ کوئی مواخذہ ہو۔ پھر آپ رضی اللہ تعالیٰ عنہ نے اپنے فرزند حضرت عبداللہ بن عمر رضی اللہ تعالیٰ عنہما کو پاس بٹھا کر اپنے قرضوں کی ادائیگی کے بارے میں ہدایتیں فرمائیں اوران کو حضرت بی بی عائشہ رضی اللہ تعالیٰ عنہا کے پاس روضۂ منورہ میں دفن ہونے کی اجازت لینے کے لیے بھیجا۔ جب حضرت عبداللہ رضی اللہ تعالیٰ عنہ حضرت بی بی عائشہ رضی اللہ تعالیٰ عنہاکے پاس پہنچے تو وہ رو رہی تھیں۔ انہوں نے فرمایا کہ روضۂ منورہ کے اندر ایک قبر کی جگہ ہے جس کو میں نے اپنے لیے رکھا تھا مگرآج میں حضرت عمر رضی اللہ تعالیٰ عنہ کو اپنی ذات پر ترجیح دیتی ہوں۔ جب حضرت عبداللہ رضی اللہ تعالیٰ عنہ نے واپس ہو کر اجازت کی خوشخبری سنائی تو امیر المومنین رضی اللہ تعالیٰ عنہ نے خوش ہو کر فرمایا کہ