Brailvi Books

شام وُہی اسلامی بھائی مَحَبَّت بھرے انداز میں ایک دم اِصرار پر اُتر آئے کہ آج تو تم کو چلنا ہی پڑے گا ، میں ٹالتا رہا مگر وہ نہ مانے اور دیکھتے ہی دیکھتے اُنہوں نے رِکشہ روک لیا اور بڑی مِنَّت کیساتھ کچھ اس انداز میں بیٹھنے کیلئے درخواست کی کہ اب مجھ سے اِنکار نہ ہوسکا ، میں بیٹھ گیا اور ہم دعوتِ اسلامی کے اوَّلین مَدَنی مرکز جامِع مسجِد گلزارِ حبیب آپہنچے ۔جب دعاء کیلئے بتّیاں بجھائی گئیں تو یہ سمجھ کر کہ اجتِماع ختم ہوگیا ،میں اُٹھ گیا، مجھے کیا معلوم کہ اب آنے والے لمحات میں میری تقدیر میں مَدَنی انقِلاب برپا ہونے والا ہے۔ خیر میرے اُس مُحسِن اسلامی بھائی نے مَحَبَّت بھرے انداز میں سمجھابجھاکر مجھے جانے سے روکا،میں دوبارہ بیٹھ گیا ۔ اندھیرے میں بآوازِ بُلند ذِکرُ اللہ عَزَّوَجَلَّ کی دھوم نے میرا دل ہِلادیا ! خدا کی قسم ! میں نے زندَگی میں کبھی ایسی رُوحانیت دیکھی تھی نہ سُنی تھی۔ پھر جب رِقّت انگیز دعاء شُروع ہوئی تو شرکائے اجتِماع کی ہِچکیوں کی آوازبُلند ہونے لگی حتیّٰ کہ میرے جیساپتھّردل آدَمی بھی پھوٹ پھوٹ کر رونے لگا ،میں نے اپنے گُناہوں سے توبہ کی اور دعوتِ اسلامی کے مَدَنی ماحول کا ہوکر رَہ گیا ۔