Brailvi Books

دعوتِ اسلامی کے مَدَنی قافِلوں میں سفر کی بَرَکت سے کئی مسائل حل ہو جاتے ہیں اور مُتَعدَّد اَمراض کاعلاج ہو جاتا ہے چُنانچِہ ایک اسلامی بھائی کا کچھ اس طرح بیان ہے کہ ہمارا 12 دن کا مَدَنی قافِلہ بلوچستان سے واپَسی پر کسی اسٹیشن پر اُترا، قافِلے والے انفِرادی کوشِش میں مشغول ہوئے، اِس دوران وہاں ایک اسلامی بھائی سے ملاقات ہوئی،وہ مَدَنی قافلوں کی بَرَکتیں لوٹنے کا اپناذاتی تجربہ بیان کرتے ہوئے فرمانے لگے،میں گُردے کی پتھری کے سبب سخت اَذِیَّت میں تھا، ڈاکٹر نے آپریشن کا کہا تھا، دریں اَثنا ایک اسلامی بھائی نے مجھ پر انفِرادی کوشِش کرتے ہوئے دلاسہ دیاکہ گھبرایئے نہیں مَدَنی قافِلے میں سفر کر لیجئے، سفر میں دُعاء قَبول ہوتی ہے۔ اللہ عَزَّوَجَلَّ آپ کا مسئلہ حل فرما دے گا۔ ان کے مَحَبّت بھرے انداز نے دل جیت لیا اور میں تین دن کے مَدَنی قافِلے کا مسافِر بن گیا۔