Brailvi Books

    حديثِ پاک ميں سونے چاندی کے برتنوں ميں کھانے پينے کی ممانعت بطورِ مثال پيش کی گئی ہے، اسی لئے علماء کرام رحمہم اللہ تعالیٰ نے ان کے استعمال کے دیگر طریقوں کو بھی اس حکم کے ساتھ ملا ديا ہے اور سونے چاندی کے برتنوں کو جمع کرنا بھی اس کے ساتھ ملحق کر ديا ہے۔ لہذا يہ بھی حرام ہے کيونکہ انہیں جمع کرنا ان کے استعمال کی طرف لے جاتا ہے جيسے کھيل کود کے آلات کو جمع کرنا۔

وہ برتن جن کے استعمال کی رخصت ہے:

    اِنَآءٌ(یعنی برتن) سے مراد ہر وہ چيز ہے جو عرف ميں اس کام میں استعمال ہو جس کے لئے اسے بنایا گیا ہو، لہذا اس ميں سرمہ ڈالنے والی سلائی، سرمہ دانی، خلال کرنے اورکان سے ميل نکالنے والی سلائی وغيرہ بھی شامل ہے، البتہ اگر کسی کی آنکھ ميں تکليف ہو اور اسے عادل طبيب کہے کہ سونے يا چاندی کی سلائی سے سرمہ ڈالنا اس تکليف کے لئے مفيد ہے تو اس کے لئے ضرورت کی بناء پر اسے استعمال کرنا جائزہے۔

     استعمال کی حرمت کے لئے برتن کا خالص سونے يا چاندی کا ہونا ضروری نہيں بلکہ اگر تانبے کے برتن پر سونے يا چاندی کا پانی اس طرح چڑھايا جائے کہ وہ اس کو چھپا دے، لیکن جب اسے آگ پر رکھا جائے تب اس کا اثر ظاہر ہو تو اس کا استعمال بھی حرام ہے،۱؎

۱؎ :احناف رحمہم اللہ تعالیٰ کے نزديک: ''ٹو ٹے ہوئے برتن کو سونے يا چاندی کے تار سے جوڑنا جائزہے جبکہ اس جگہ سے استعمال نہ کيا جائے۔''

 (بہار شريعت،ج۲،حصہ ۱۶،ص۳۵)