Brailvi Books

اکثر خطائیں زَبان سے ہوتی ہیں

میٹھے میٹھے اسلامی بھائیو!واقِعی غلط چلنے والی زَبان انسان کو بَہُت پریشان کرتی ہے، انسان اِسی زبان سے گالیاں نکال کر ، جھوٹ بول کر، غیبتیں کرکے چُغلیاں کھا کر اپنی آخِرت کو داؤ پر لگاتا ہے ۔ اِس زَبان کی آفتوں سے اللہ عَزَّوَجَلَّ کی پناہ !مشہورصَحابی حضرتِ سیِّدُنا عبداللہ بن مسعود رضی اللہ تعالیٰ عنہ سے روایت ہے کہ خلق کے رہبر،شافعِ محشر، محبوبِ داور عَزَّوَجَلَّ وَ صلَّی اللہ تعالیٰ علیہ واٰلہٖ وسلَّم نے اِرشاد فرمایا:انسان کی اکثر خطائیں اس کی زَبان سے ہوتی ہیں۔

(اَلْمُعْجَمُ الْکبِیر لِلطّبَرانی ج۱۰ص۱۹۷حدیث۱۰۴۴۶)

روزانہ صُبح اَعضاء زَبان کی خوشامد کرتے ہیں

حضرتِ سیِّدُنا ابوسعید خُدری رضی اللہ تعالیٰ عنہ سے روایت ہے:جب انسان صُبح کرتا ہے تو اُس کے تمام اَعضاء زَبان کے سامنے عاجِزانہ یہ کہتے ہیں:ہمارے بارے میں اللہ عَزَّوَجَلَّ سے ڈر!کیونکہ ہم تجھ سے وابَستہ ہیں اگر تو سیدھی رہے گی تو ہم سیدھے رہیں گے اگر تو ٹیڑ ھی ہوگی تو ہم بھی ٹیڑھے ہوں۔

(سُنَنِ تِرمِذی ج۴ ص۱۸۳حدیث ۲۴۱۵)