حدیث ۱: صحیح بُخاری و مسلِم میں اسما بنت ابو بکر رضی اﷲ تعالیٰ عنھما سے مروی، کہ ایک عورت نے عرض کی یا رسول اللہ! ہم میں جب کسی کے کپڑے کو حَیض کا خون لگ جائے تو کیا کرے؟ فرمایا: '' جب تم میں کسی کا کپڑا حَیض کے خون سے آلودہ ہو جائے تو اسے کھرچے، پھر پانی سے دھوئے تب اُس میں نماز پڑھے۔'' (1)
حدیث ۲: صحیحین میں ہے ام المومنین صدیقہ رضی اﷲ تعالیٰ عنہا فرماتی ہیں، کہ رسول اﷲ صلی اﷲ تعالیٰ علیہ وسلم کے کپڑے سے مَنی کو میں دھوتی ،پھر حضور نماز کو تشریف لے جاتے اور دھونے کا نشان اس میں ہوتا۔ (2)
حدیث ۳: صحیح مسلِم میں ہے فرماتی ہیں ،کہ میں رُسول اﷲ صلی اﷲ تعالیٰ علیہ وسلم کے کپڑے سے مَنی کو مَل ڈالتی، پھر حضور اس میں نماز پڑھتے۔ (3)
حدیث ۴: صحیح مسلِم میں عبداﷲ بن عباس رضی اﷲ تعالیٰ عنھما سے مروی، رسول اﷲ صلی اﷲ تعالیٰ علیہ وسلم فرماتے ہیں: ''چمڑا جب پکا لیا جائے، پاک ہو جائے گا۔'' (4)
حدیث ۵: اِمام مالِک ام المومنین صدیقہ رضی اﷲ تعالیٰ عنہا سے راوی ،رسول اﷲ صلی اﷲ تعالیٰ علیہ وسلم نے حکم فرمایا: ''کہ مُردار کی کھالیں جب پکالی جائیں تو انھیں کام میں لایا جائے۔'' (5)
حدیث ۶: امام احمدو ابو داود و نَسائی نے روایت کی ،رسول اﷲ صلی اﷲ تعالیٰ علیہ وسلم نے درندوں کی کھال سے منع فرمایا۔(6)
حدیث ۷: دوسری روایت میں ہے ان کے پہننے اور ان پر بیٹھنے سے منع فرمایا۔ (7)