Brailvi Books

کھانے یاسونے کا ارادہ فرماتے تو نماز کا سا وُضو فرماتے۔'' (1) 

    حدیث ۱۶: مسلِم میں ابو سعید خُدْری رضی اﷲ تعالیٰ عنہ سے مروی، رسول اﷲ صلی اﷲ تعالیٰ علیہ وسلم فرماتے ہیں: '' جب تم میں کوئی اپنی بی بی کے پاس جا کر دوبارہ جانا چاہے تو وُضو کرلے۔'' (2) 

    حدیث ۱۷: تِرمذی ابن عمر رضی اﷲ تعالیٰ عنھما سے راوی، کہ رسول اﷲ صلی اﷲ تعالیٰ علیہ وسلم نے فرمایا: '' کہ حَیض والی اور جنب قرآن میں سے کچھ نہ پڑھیں۔'' (3) 

    حدیث ۱۸: ابو داود نے اُمُّ المُومِنین صدیقہ رضی اﷲ تعالیٰ عنہا سے روایت کی، کہ حضور اقدس صلی اﷲ تعالیٰ علیہ وسلم نے فرمایاـ:'' ان گھروں کا رُخ مسجد سے پھیر دو کہ میں مسجد کو حائض اور جنب کے لیے حلال نہیں کرتا۔'' (4) 

    حدیث ۱۹: ابو داود نے حضرت علی رضی اﷲ تعالیٰ عنہ سے روایت کی، رسول اﷲ صلی اﷲ تعالیٰ علیہ وسلم فرماتے ہیں کہ:'' ملائکہ اس گھر میں نہیں جاتے جس گھرمیں تصویر اور کُتّا اور جنب ہو۔'' (5) 

    حدیث ۲۰: ابو داود عَمّار بن یاسِر رضی اﷲ تعالیٰ عنھما سے راوی، رسول اﷲ صلی اﷲ تعالیٰ علیہ وسلم نے فرمایا: ''فرشتے تین شخصوں سے قریب نہیں ہوتے، (۱) کافر کا مردہ، اور (۲) خلوق (6) میں لتھڑا ہوا، اور (۳) جنب مگر یہ کہ وُضو کرلے۔'' (7) 

    حدیث ۲۱: اِمام مالِک نے روایت کی، کہ رسول اﷲ صلی اﷲ تعالیٰ علیہ وسلم نے جو خط عمرو بن حزم کو لکھا تھا اس میں یہ تھا کہ قرآن نہ چھوئے مگر پاک شخص۔ (8) 

    حدیث ۲۲: امام بُخاری و امام مسلِم نے ابن عمر رضی اﷲ تعالیٰ عنھما سے روایت کی، رسول اﷲ صلی اﷲ تعالیٰ علیہ وسلم نے فرمایا: ''جو جمعہ کو آئے اسے چاہیے کہ نہالے۔'' (9)