Brailvi Books

علامہ شعرانی رحمۃ اﷲ تعالٰی  علیہ نے اپنی دینی کتاب عہود المشائخ میں فرمایاکہ اپنے ہم دوستوں میں سے کسی کو ایسے امر پر نکیر کی اجازت نہ دیں گے جسے مسلمانوں نے اﷲ عزوجل کی بارگاہ میں تقرب کے طور پر ایجاد کیا ہو اور اسے اچھا جانتے ہوں۔ خصوصاً ایساکام جسکا تعلق خداتعالٰی  اور اسکے رسول صلی اﷲ تعالٰی  علیہ وسلم سے جیسے جنازہ کے آگے لاالٰہ الااﷲ محمد رسول اﷲ صلی اﷲ تعالٰی  علیہ وسلم پڑھنا اورا س کے سامنے قرآن کی تلاوت کرنا،یا ایسے دوسرے کام--جواسے حرام کہے وُہ فہمِ شریعت سے قاصر ہے، اس لئے کہ ہر وہ کام جو عہد رسول اﷲ صلی اﷲ تعالٰی  علیہ وسلم میں نہ رہا ہو بُرا نہیں، اگر یہ دروازہ کھولا جائے تو مجتہدین کرام کے وہ سارے اقوال مردود ٹھہریں جو انہوں نے اپنی پسند کردہ اچھی چیزں کے بارے میں فرمائے ہیں--اور اس کا کوئی قائل نہیں--خودرسول اﷲ صلی اﷲ تعالٰی  علیہ وسلم نے اپنی امت کے علماء کے لئے یہ دروازہ کھول رکھا ہے اور انہیں اجازت دی ہے کہ جو طریقہ بھی اچھا سمجھیں اسے جاری کریں  اور رسول اﷲ صلی اﷲ تعالٰی  علیہ وسلم کی شریعت میں شامل کریں یہ اجازت رسول اﷲ تعالٰی  علیہ وسلم کے اس ارشاد گرامی سے ثابت ہے: جوشخص کوئی اچھا کام ایجاد کرے اسے اس ایجاد کا ثواب ملے گا  اور اس طریقے پر ائندہ سارے عمل کرنے والوں کا بھی ثواب ملے گا--کلمہ لاالٰہ الاﷲ محمدرسول اﷲ صلی اﷲ تعالٰی  علیہ وسلم تو سب سے بڑی نیکی ہے پھر اس سے کیوں کر روکا جائےگا؟-- اس زمانے میں جنازے کے اندر اکثر لوگوں کےاحوال پر نظر کرو دنیاکی باتوں میں مشغول ملیں گے جنہیں میت کےحال سے کوئی عبرت نہیں، ان کا دل اس سارے واقعے سے غافل ہے، بلکہ ان میں ہسنے والے بھی نظر آئیں گے--ذکر نہ کریں تو یہ حالت اور ذکر میں مشغول ہوں تو یہ اعتراض ہے کہ یہ رسول اﷲ صلی اﷲ تعالٰی  علیہ وسلم کے زمانہ میں نہ تھا۔ ہمارے نزدیک جب ایسا تعارض درپیش ہے تو ہم اﷲ کے ذکر کو مقدم رکھیں گے--اب اگر سارے شرکاءِ جنازہ پکار کر لاالٰہ الاﷲ کہیں تو اس پر کوئی اعتراض نہیں۔ اس سے ممانعت میں رسول اﷲ صلی ا تعالٰی  علیہ وسلم کا کوئی ارشاد وارد نہیں۔ اگر جنازے میں ذکر الٰہی ممنوع ہوتا تو کسی نہ کسی حدیث میں تو یہ حکم وارد ہوتا، جیسے رکوع میں قرآن شریف پڑھنا ممنوع ہے تو اس بارے میں حدیث آئی ہے۔ تو جس چیز سے ابتدائے اسلام میں شارع علیہ الصلٰوۃ والصلام نے سکونت فرمایا وہ ہمارے آخر زمانے میں ممنوع نہیں ہوسکتی اھ باختصار قلیل(ت)