Brailvi Books

دلیل ۹۶ : جو(عہ۱) پرند ہم سے جنوب یا شمال کی طرف ہوا میں ہو تیر سے شکار نہ ہوسکے (مفتاح) اقول جنوب وشمال کی تخصیص بیکارہے بلکہ مشرق پر اعتراض اظہر ہے اور استحالے میں یہ زائد کرنا چاہئے یاوہ پرند کہ ہم سے دس گز کے فاصلے پر تھا صدہا گز کے فاصلے پرگرے۔ بیان اس کا یہ ہے کہ تیر وکمان اٹھانا، تیر جوڑنا، کمان کھینچنا،تیر چھوڑنا اگر دو ہی سیکنڈ میں ہو جائے اور آدمی پرند کو  اپنے سےدس گز کے فاصلے پر دیکھ کر یہ افعال کرے  تو خود حرکت زمین کے سبب اتنی دیر میں وہاں سےایک ہزار تیرہ گز کے فصل پر ہو جائے گااب اگر اسی محاذات پر تیر چھوڑا جیساکہ یہی ہوتا ہے تو تیر سیدھا شمال کو گیااور جانور شمالی غربی ہے یا سیدھا جنوب کو اور جانور جنوبی غربی یامشرق کو اور جانور مغرب میں ہو گیا۔ ان تینوں صورتوں میں تیر جانور کی سمت ہی پر نہ گیا اور مشرق میں سب سے بڑھ کر حماقت اور مغرب  میں اگرچہ سمت وہی رہی جانور ۱۰۲۳ گز کے فاصلے پر ہو گیا یونہی اوراگر ان تینوں جہات میں تیر چھوڑتے وقت محاذات بدل لی تو اگر جانور مشرق میں تھا اب ہزار گز سے زیادہ مغرب ہو گیا، اور اگر جنوب یا شمال میں تھاتو ایک ہزار تیرہ گز سے کچھ کم فاصلے پر ہو گاکہ ۸۴ء۱۰۲۵۸۶۳  ۲؂ کا جذر ہے بہر حال اب تیر اس تک کہاں پہنچتا ہے، اور اگر فرض کر لیجئےکہ دس گز کے فصل پر آنے سے پہلے یہ سب کام ہوئے تھے یعنی پہلے سے کسی اور وجہ سےتیر کمان میں جوڑا ہو اور کمان کھینچی ہوئی تھی کہ اس جانور کیلئےہزار گز فاصلے سے ایسا کرنانہیں خیر  کسی طرح یہ سب کام تیارتھاکہ تیر عین اسی وقت چھوٹا کہ جانور دس گز کے فاصلے پر محاذات میں تھاتو تیر تو ضرور اس کے لگ جائے گا کہ جانور کی طرح تیر بھی چھوٹ کر حرکت زمین کاتابع نہ رہا مگر تیر اس تک اگر دو ہی سیکنڈ میں پہنچے تو ہم اتنی دیر میں ایک ہزار تیرہ گز مشرق کو چلے جائیں گے اور وہی فاصلے جو صورت دوم میں تیر کو جانور سے تھے ہم کو اس سے ہو جائیں گے۔ تو اب ہمیں ہزار گز سے  زائدپلٹنا چاہئے کہ گرے ہوئے جانور کو پائیں ۔ یہ تمام صورتیں لاکھوں بار کے مشاہدہ سے باطل ہیں ، لہذا حرکت زمین باطل۔