Brailvi Books

اﷲ تعالٰی نے فرمایاکہ انہیں ان کے باپ ہی کاکہہ کرپکارو یہ اﷲ تعالٰی کے نزدیک زیادہ ٹھیک ہے پھراگرتمہیں ان کے باپ معلوم نہ ہوں تو دین میں تمہارے بھائی ہیں اوربشریت میں تمہارے چچازاد۔ اوراﷲ تعالٰی نے فرمایا: محمد(صلی اﷲ تعالٰی علیہ وسلم) تمہارے مردوں میں سے کسی کے باپ نہیں، ہاں اﷲ تعالٰی کے رسول ہیں اور سب نبیوں میں پچھلے۔ اوراﷲ تعالٰی نے فرمایا کہ مسلمانوں پرکچھ حرج نہ رہے ان کے لے پالکوں کی بیویوں میں۔(ت)

 (۱؎ القرآن الکریم     ۳۳/ ۵) (۱؎ القرآن الکریم    ۳۳/ ۴۰) (۲؎القرآن الکریم    ۳۳/ ۳۷)

خلف بمعنی جانشین ہے، اوربیٹے کوبھی کہتے ہیں جبکہ اپنے باپ کے بعد رہے۔ واﷲ تعالٰی اعلم۔

سوال دوم: اگرکوئی شخص کسی دوسرے شخص کو اپناباپ کہے تووہی شخص اس کااصلی باپ سمجھاجائے گایانہیں؟

الجواب: ہرگزنہیں مگر اس صورت میں کہ یہ شخص مجہول النسب ہو اوربلحاظ عمراس کابیٹاہوسکتاہو اوراسے اپناباپ بتائے اوروہ قبول کرے کہ واقعی یہ میرے نطفہ سے ہے تو وہ اس کااصلی باپ سمجھاجائے گا۔واﷲ تعالٰی اعلم

سوال سوم: متروکہ علی مظفرخاں کے وارث شرعی خاندان وزیرخاں ساکن بدایوں کے سمجھے جائیں گے یاخاندان نواب غلام احمدخاں ساکن بریلی کے؟

الجواب: جب کہ علی مظفرخاں لاولدتھے اورکوئی بھائی بھتیجابھی نہ تھا توان کے وارث وزیرخاں کے بیٹے پوتے ہوں گے نہ کہ خاندان نواب غلام احمدخاں۔

قال اﷲ تعالٰی واولوالارحام بعضھم اولٰی ببعض فی کتاب اﷲ۳؎۔

اﷲ تعالٰی نے فرمایا: اوررشتے والے ایک سے دوسرے زیادہ نزدیک ہیں اﷲ کی کتاب میں۔(ت)

 (۳؎القرآن الکریم   ۸/ ۷۵)

حدیث میں ہے:

الحقواالفرائض باھلھا فما بقی فھو لاولی رجل۱؎۔ واﷲ تعالٰی اعلم۔

فرائض اہل فرائض کودو، جوباقی بچے وہ قریبی مرد کے لئے ہے۔ اوراﷲ تعالٰی خوب جانتاہے۔(ت)

 (۱؎ صحیح البخاری    کتاب الفرائض    باب میراث الولد من ابیہ وامہ     قدیمی کتب خانہ کراچی    ۲/ ۹۹۷)

(صحیح مسلم        کتاب الفرائض     ۲/ ۳۴    وجامع الترمذی        کتاب الفرائض    ۲/ ۳۱     مسنداحمدبن حنبل    ۱/ ۳۲۵)

سوال چہارم: اگرعلی مظفرعلی خاں پسرمولوی یعقوب علی خاں کے وارث شرعی خاندان وزیرخاں ساکن بدایوں سے متصور ہوں توجائداد متروکہ علی مظفرخاں حسب تفصیل مندرجہ شجرہ آپس میں کس طرح تقسیم ہوگی؟ امیدکہ جواب باصواب بآیات قرآن وحدیث مرفوعہ موافق مذہب حنفیہ مع عبارات وحوالہ کتاب صحیح صحیح طورپرصاف صاف لفظوں میں بمصداق آیہ کریمہ:

ولاتلبسواالحق بالباطل وتکتموا الحق وانتم تعلمون۲؎۔

اور حق سے باطل کونہ ملاؤ اوردیدہ دانستہ حق کو نہ چھپاؤ۔(ت) مرحمت فریایاجائے۔ بیّنواتوجروا۔

 (۲؎ القرآن الکریم     ۲/ ۴۲)

الجواب: سائل نے نہ لکھاکہ علی مظفرخاں کے بعد ان کے پانچوں چچوں میں کوئی زندہ تھایانہیں۔ علی مظفرخاں کے ترکہ سے حسب شرائط فرائض چہارم حسینی بیگم کاہے باقی حسین علی خاں کاہے اگروہ زندہ رہاہو تو سوتیلے چاروں چچوں میں ایک یازائد جتنے علی مظفرخاں کے بعد زندہ رہے ہوں وہ باقی ان سب کابحصہ مساوی ہے اوراگرکوئی زندہ نہ تھا توباقی ان دسوں چچازادبھائیوں کاہے ولایتی بیگم واولاد افرادبیگم کابہرحال کچھ نہیں۔ اسی طرح باقی آٹھوں دختران اعمام علاتی کچھ نہ پائیں گی۔ یہ سب جواب اس تقدیر پرہے کہ سائل نے پوری صحیح بات لکھی ہو، حق نہ چھپایاہو، نہ سچ میں جھوٹ ملایاہو، ورنہ وبال اس پرہے۔واﷲ تعالٰی اعلم