Brailvi Books
 |
فتاویٰ رضویہ جلد نمبر۲۶ (کتاب الفرائض ، کتاب الشتّٰی ) |
25 - 145
رسالہ المقصدالنافع فی عصوبۃ الصنف الرابع(۱۳۱۵ھ) (چوتھی قسم کے عصبہ ہونے میں نفع دینے والامقصد)
بسم اﷲ الرحمٰن الرحیم ط
مسئلہ ۶۵ :ازاٹاوہ متصل کچہری منصفی مکان مولوی حبیب علی صاحب مرسلہ مولوی وصی علی ۵رمضان المبارک ۱۳۱۵ھ کیافرماتے ہیں علمائے دین اس مسئلہ میں کہ عصبات کی جوچارقسم مقررہیں، فروع میت، اصول میت، فروع اب میت، فروع جد میت، منجملہ ان کی قسم اول ودوم وسوم میں کوئی بحث نہیں مگر قسم چہارم یعنی فروع جد میت کاسلسلہ ایساوسیع ہے کہ حق رسی اس کی دشوار بلکہ غیرممکن معلوم ہوتی ہے کیونکہ کوئی مسلمان ایسانہ ہوگا جس کاعصبہ نسبی قسم چہارم یعنی دادا کی اولاد یا پردادا کی اولاد یاسردادا کی اولاد یا ان سے بھی عالی کسی جد کی اولاد موجود نہ ہو اگردیہہ یاقصبہ مسکونہ میت میں نہ ہوگا تودوسرے دیہہ یاقصبہ میں یادوسرے شہریاملک میں ہوگا مثلاً ہندمیں نہ ہوگا توعرب یاعجم میں ہوگا تمامی ربع مسکون میں کہیں نہ کہیں ضرورموجود ہوگا، پس درصورت عدم موجودگی عصبات قسم اول ودوم وسوم کے ایسے عصبات کوتلاش کرنا اور ان کا حصہ ان کو پہنچانا غیرممکن ہے اورظاہراً شرع شریف میں کوئی ایساحکم بھی پایانہیں جاتا کہ میت کے ورثاء حاضرین میت کے ترکہ کو باخودتقسیم کرلیں حقدار ان غیرحاضرین کو اطلاع بھی نہ دیں یاجولوگ بوجہ لاعلمی وفات مورث یابوجہ لاعلمی مسائل شرعی کے دعویدار نہ ہوں نے ان کے حقوق ضائع کردئیے جائیں بلکہ مفقود کے واسطے جبکہ یہ حکم ہے کہ حصہ اس کانوے برس کی عمر تک امانت رہے تو ایسے حصہ دار کیونکر محروم کئے جاسکتے ہیں، علاوہ اس کے دیگر حقداران جوبصورت نہ ہونے عصبات نسبی کے مستحق ہیں مثلاً مولی العتاق ذوی الفروض مستحق پانے حصہ کے بطور رد کے ذوی الارحام ولی الموالات مقرلہ النسب موصی لہ مستحق ردوغیرہ ان کے حقوق قائم ہونے کی کوئی صورت ہی نہیں معلوم ہوتی کیونکہ جب عصبہ نسبی کاغیرموجودہونا حسب تشریح صدرغیرممکن ہے توحقداران مابعد کے حقوق قائم ہونا بھی غیرممکن ہے پس ایسے حقداران کے متعلق جومسائل ہیں وہ محض بیکارہوئے جاتے ہیں حالانکہ شریعت کا کوئی مسئلہ ایسانہیں ہے جومورداعتراض کسی قسم کاہوسکے لہٰذادریافت طلب امورمصرحہ ذیل ہیں:
اوّلاً عصبات کی جواقسام قراردی گئی ہیں خصوصاً قسم چہارم جوالفاظ ''ادعالیھا''(یا اس سے اوپر۔ت) مشروع ہیں ان کا ماخذ کیاہے یعنی کس آیۃ قرآن شریف یا کس حدیث شریف سے ماخوذ ہے یااور کس ماخذ سے۔ ثانیا عصبات نسبی کاغیرموجودہونا حسب شرح صدرناممکن ہے کہ نہیں۔ ثالثا عصبات نسبی کاغیر اگرموجود ہوناناممکن ہے تومسائل متعلقہ عصبات سببی وغیرہ جوبصورت نہ ہونے عصبات نسبی کے مشروع ہیں کس صورت میں کارآمدہوسکتے ہیں۔ رابعا شرع شریف میں کہیں ایساحکم ہے کہ غیرحاضرین حصہ داران کو اطلاع نہ دی جائے یاجولوگ بوجہ لاعلمی وفات مورث یالاعلمی مسائل شرعی کے دعویدارنہ ہوں وہ اپنے حقوق واجبی سے محروم رہیں ان کی تلاش نہ کی جائے۔ خامسا ایساہوسکتاہے کہ عرب سے کوئی شخص آئے اور آپ کو سیدمثلاً اولادعلی وبنی فاطمہ ثابت کرکے ہند میں کسی اولاد علی بنی فاطمہ کاترکہ اس کے ذوی الفروض سے تقسیم کرالے یا ہند کاکوئی سیدعرب میں جاکرکسی سیدمتوفی کاترکہ پائے قاضیان عرب بصورت ثابت کردینے نسب کے اس کو دلادیں گے۔ سادساً عہدصحابہ رضوان اﷲ تعالٰی علیہم اجمعین یاتابعین یاتبع تابعین میں کبھی ایسے عصبات بعیدہ کوبمقابلہ ذوی الفروض کے حصہ دلایاگیاہے کہ نہیں، اگردلایا گیاتو کس کتاب سے ثابت ہے۔ سابعا اس استفتا کے مفتیان صاحبان کے علم میں کبھی ایسے عصبات بعیدہ مثلاً پردادا کے بھائی کی اولاد یاسردادا کے عم کی اولاد یا ان سے بھی عالی کسی جد کی اولاد کوبحالت موجودگی ذوی الفروض نسبی کے حصہ ملاہے کہ نہیں، اگرملاہے تو کب کس خاندان میں۔ ثامنا اگرکسی قصبہ یاشہر میں رواج یہ ہے کہ بصورت عدم موجودگی عصبات قسم اول ودوم وسوم کے منجملہ قسم چہارم جد کی اولاد تک بمقابلہ ذوی الفروض کے حصہ دیاجاتاہے اَب الجد یا جد الجد یااس سے بھی عالی کسی جد کی اولاد کوحصہ نہیں دیاجاتا بلکہ ذوی الفروض پررَد ہوجاتاہے تو یہ رواج قابل عملدرآمدولائق لحاظ ہے کہ نہیں؟بیّنواتوجروا(بیان فرمائیے اجردئیے جاؤگے)