Brailvi Books

الجواب :

۷۸۶

۹۲

بملاحظہ محب خدا غلام بارگاہ مصطفی جل وعلا وصلی اﷲ تعالٰی علیہ وسلم جوان صالح سعید مفلح خاں صاحب محمددلاورحسین خاں صاحب قادری برکاتی حفظہ اﷲ تعالٰی ! السلام علیکم ورحمۃ اﷲ وبرکاتہ،۔

حق سبحانہ، وتعالٰی آپ کو اپنی اوراپنے حبیب اکرم صلی اﷲ تعالٰی علیہ وسلم کی محبت کاملہ میں ابد الآباد تک سرشار رکھے اوراپنی مرضیات کی توفیق دے۔ والدین کی خدمت بچوں کی تربیت یہ بھی عین کاردین ورضائے رب العالمین ہے۔ ریاضت ومجاہدہ نام کاہے کاہے اسی کاکہ رضائے الٰہی میں اپنی خواہش کے خلاف کرنا۔ خدمت والدین وتربیت اولادرضائے رب العزت ہے اور اب کہ آپ کی طبیعت ان تعلقات سے بھاگتی ہے رضائے الٰہی کے لئے اس کاخلاف کیجئے یہی ریاضت ہوگی، تعلقات سے نفرت وہ محمودہوتی ہے جس میں حقوق شرعیہ تلف نہ ہوں ورنہ وہ بے تعلقی نفس کادھوکہ ہوتاہے کہ اپنی تن آسانی کے لئے شرعی تکالیف سے بچناچاہتاہے اوراسے دنیا سے جدائی کے پیرایہ میں آدمی پرظاہرکرتاہے۔ فقیردعاکرتاہے کہ اﷲ تعالٰی آپ کو اپناکرلے اورہمیشہ اپنے پسندیدہ کاموں کی توفیق بخشے اور آپ کے طفیل میں اس نالائق ننگ خلائق کی بھی اصلاح قلب واعمال وتحسین احوال وافعال وتحصیل مرادات وآمال فرمائے اعدائے دین پرمظفر ومنصور رکھے خاتمہ ایمان وسنت پر کرے، آمین بجاہ سیدالمرسلین صلی اﷲ تعالٰی علیہ وعلٰی آلہٖ وصحابہ وابنہ واحزابہ اجمعین آمین والحمدﷲ رب العٰلمین۔

مشترک مال تقسیم کرکے نابالغوں کاحصہ جداکرنے کا ان کے باپ کومطلقاً اختیارہوتاہے اور ایسی تقسیم تووصی کوبھی رواہے کہ وارثان بالغین حاضرین کاحصہ جداکرکے ان کو دے دے اور نابالغوں کے حصے بلاتقسیم الگ کرلے تو آپ کو بدرجہ اولٰی جائزہے کہ بچوں کے ناناکے ساتھ تقسیم کرکے بچوں کاحصہ جداکرلیجئے نیزباپ کوجبکہ  فاسق وفاسد نہ ہوجائزہے کہ ا ن کے ایسے اموال بازار کے بھاؤپر خودخریدلے بازارکے بھاؤ میں چیز کی اصل لاگت نہیں دیکھی جاتی بلکہ یہ اس حالت میں موجودہ پر  بازارمیں بیچیں تو کیادام اٹھیں گے۔ پہننے کے کپڑوں کی یہ حالت ہوتی ہے کہ نیاتازہ جوڑا اسی وقت بازارمیں بیچئے تو ہرگز آدھے دام بھی نہیں لگتے نہ کہ استعمال پہنے ہوئے نہ کہ ایسامال جس کابِکنادشوار اور رکھے رکھے بیکارہوجائے گا اندیشہ اسے خریدلینے میں توبچوں کاسراسر نفع ہے نیز اس کو رواہے کہ بچوں کامال قرضوں خریدلے یعنی قیمت فی الحال نہ دی جائے گی بلکہ اتنے دنوں کے وعدہ پر مگرروپیہ بیع نہیں ہوسکتا ہاں باپ اپنی حاجتمندی کی حالت میں اس میں سے بقدرضرورت خرچ کرسکتاہے اوران کاروپیہ خود بطور قرض لے لینے کابھی باپ کو اختیارہے یانہیں اس میں علماء مختلف ہیں بہت کتابیں جواز کی طرف ہیں باپ اگردین دارمتدین خداترس ہو تو اس کے لئے جواز پرفتوی دینے میں کچھ باک نہیں آپ بفضلہ تعالٰی ان صفات کے جامع ہیں پھرجوکچھ ان کے مال سے قرض لیجئے یاقرضوں ایک میعاد معین پر خریدئیے اس کا کاغذ لکھ دینا چاہئے کہ کسی وقت بچوں کوضرر نہ پہنچے اوراس سب سے بہتراورخالص بے دغدغہ یہ صورت ہے اگرممکن ہوکہ اس ترکہ میں نابالغوں کاجتناحصہ ہے مثلاً اگر سب ترکہ نو سوروپے کی مالیت کاہے توبچوں کاحصہ سواپانسو روپے ہوا اس کے عوض اتنے یا اس سے کچھ خفیف زیادہ مالیت کی اپنی جائداد زمین یامکان یادکان یاگاؤں میں سے بچوں کے نام بیع کردیجئے اورکاغذ لکھ دیجئے کہ باپ برابرقیمت کوبھی اپنامال بچوں کے ہاتھ بیچ سکتاہے یوں ترکہ میں جس قدر ان کا حصہ اور زیورواسباب میں ہے سب آپ کاہوجائے گا جوچاہئے کیجئے پھر وہ جائداد کہ جوبچوں کےنام آپ بیچیں گے اس کے حفظ ونگہداشت و غور پر داخت و تحصیل و تصرف کا اختیار بھی بچوں کے بالغ ہونے تک آپ ہی کوہوگا، اوراگرآپ کے پاس مال نہ ہو تو اس کی آمدنی س آپ بقدرکفایت اپنے کھانے پہننے کابھی صرف کرسکیں گے جس میں بچوں کاضرر نہ ہوگا اوراگرآپ خود اس کے کام اہتمام سے بچناچاہیں تویہ بھی رواہوگا کہ کسی ہوشیارکارگزار دیندار دیانتدار کوکارکن بنائیں یوں ہی ہر طرح سبکدوشی ہوسکتی ہے۔ رہا نانا کاحصہ، وہ اگریونہی آپکومعاف کردیں تومعاف نہ ہوگا یاقبل تقسیم آپ کو ہبہ کردیں توجائزنہ ہوگا بلکہ تقسیم کرکے ان کو سپرد کردیجئے پھروہ چاہیں توآپ کو ہبہ کردیں یابلاتقسیم اپناحصہ آپ کے ہاتھ بیچ کر زرثمن معاف کردیں اور اس صورت میں ضرور ہوگا کہ زرثمن اتناٹھہرے جس کا وزن اس قدرچاندی کے چھٹے حصے سے زائد ہوجوترکہ کے نقدوزیوروغیرہ میں ہے کہ یہی چھٹاحصہ مرحوہ کے باپ کا ہے یایوں کریں کہ اپنا حصہ مثلاً ایک کتاب کے عوض آپ کے ہاتھ بیع کردیں وہ کتاب ہی اس کامعاوضہ ہوجائے گی اورپھر معافی کی کوئی حاجت نہ رہے گی اگرچہ کتاب چارہی ورق کی ہو، یونہی ان کے تمام حصے کے عوض  یک رومال دے کربھی بیع ہوسکتی ہے فقط باہمی رضادرکار ہے۔