Brailvi Books

 (۲) اجرت پردینے والا بطور کرایہ کرایہ دار کے سپرد کردے، جیسے کہ غمزالعیون والبصائر میں بزازیہ سے نقل کیاگیاہے کہ اجارہ فاسدہ میں کرایہ صرف اس وقت واجب ہوتاہے جب حقیقۃً بھرپور نفع حاصل کیاجائے اوربطورکرایہ، کرایہ دار کو، چیزسپردکی جائے۔ فتاوٰی ہندیہ (عالمگیری) میں ہے کہ جب حقیقۃً بھرپور نفع حاصل کرناپایاجائے تو کرایہ صرف اس صورت میں واجب ہوگا جب کرایہ پردینے والا کرائے کی چیز کوکرایہ دارکے سپرد کردے گا۔ پس جس صورت میں کرائے دار عمرونے اس مکان میں ایک دن بھی قیام نہیں کیا، نہ ہی وہ مکان خالی تھا، کیونکہ ہندہ جواس مکان کی مالک تھی اس مکان میں رہائش پذیرتھی، یہ مت پوچھئے کہ رہن کوبطور کرایہ دینے والوں نے کتنے سال عقد کو فسخ کرنے کی فکرکی ہوگی؟ یارہن کوچھڑانے اوررہن رکھی ہوئی چیزکو تبدیل کرنے پرکتنی مدت صرف ہوئی ہوگی؟

بہرصورت عمروکے ذمہ پر کرایہ لازم نہیں ہے، اس لئے کہ جب حقیقت انتفاع ہوائے عدم میں پرَکھولتی ہے توکرائے کالازم ہونابھی اپنی لگام پھیرلے گا(یعنی جب حقیقۃً نفع حاصل نہیں کیاگیاتو کرایہ بھی لازم نہیں ہے۱۲مترجم) اگرچہ نفع حاصل کرنے کی قوت ہزارمرتبہ ہو، آپ اس جگہ کیاپوچھتے ہیں کہ یہاں تونفع حاصل کرنے کی قدرت بھی نہیں ہے، زیدکوکہیں کہ عمروکاگریبان چھوڑدے، زیدکے گواہوں کی گواہی سے بھی اس جگہ کوئی کام نہیں بنتا اورپانی کارآمد ثابت نہیں ہوتا، کیونکہ قبولیت کی شرطیں جمع ہونے کی صورت میں بھی ان کے بیان سے صرف یہی بات ثا بت ہوتی ہے کہ مدعاعلیہ نے اس مکان پرقبضہ کرلیا اوراپنے متعلقین سمیت اس میں رہائش اختیار کرلی، یہ بات کہاں سے ثابت ہوئی کہ مدعی نے بھی وہ مکان اپنے سامان سے خالی کرکے مدعالیہ کے سپردکیا۔ ہم اس سے پہلے بیان کرچکے ہیں کہ محض رہائش کا اس جگہ کوئی فائدہ نہیں ہے جب تک کہ مالک بطور کرایہ کرائے دار کے سپرد نہ کرے، ہوسکتاہے کہ عمرو کی رہائش اسی معلوم بے تکلفی پرمبنی ہو جوماں باپ اوراولاد کے درمیان ہوتی ہے،جیسے کہ آپ جانتے ہیں کہ مسکین اولاد اگرچہ الگ رہتی ہو ان کے لئے گاہے بگاہے والدین کے پاس رہنے سے کوئی چیز مانع نہیں ہے، گواہوں کے اس بیان سے نفع حاصل کرنے کی مدت بھی واضح نہیں ہوتی اوران کایہ کہنا کہ ''تاحال مدعاعلیہ کا اس مکان پرقبضہ ظاہروباہر ہے'' کس کام آئے گا؟ کیونکہ قبضہ دونوں صورتوں کوشامل ہے(۱)نفع حاصل کرنے اور (۲) نفع حاصل کرنے کی قوت (یعنی بالفعل اور بالقوۃ نفع حاصل کرنے کو شامل ہے ) اور اس جگہ صرف نفع حاصل کرنے کی قوت بے فائدہ ہے، جیسے کہ ہم اس سے پہلے بیان کرچکے ہیں۔ کہنے والی ایک بات رہ گئی اوروہ یہ کہ مدعاعلیہ نے جو اقرارنامہ تحریرکیاوہ بالکل لغو اور مہمل ہے، اس کے بیان پرکوئی حکم نہیں لگایاجاسکتا، اس نے صرف ایک وعدہ کیاہے اور وہ بھی ایسی چیزکاجوشرعاً صحیح نہیں ہے، لہٰذا نہ تومواخذہ ہوسکتاہے اورنہ ہی مدعی کامطالبہ جائزہے۔ مختصر یہ کہ غیر کی ملکیت کوشریعت مطہرہ کی اجازت کے بغیر کرائے پردینے میں اگرمنافع کے حاصل کرنے سے پہلے مالک اجازت دے بھی دے کرائے کامستحق وہ ہے جو کرائے کاعقد کرنے والاہے، شریعت مبارکہ کاحکم ہے کہ یا توصدقہ کردے یاپھرمالک کوواپس کردے جیسے کہ منیۃ المفتی، خانیہ، غمزالعیون، عالمگیری وغیرہ میں ہے، جس صورت کے بارے میں سوال کیاگیاہے اس میں وجوہ مذکورہ بالا کی بناپرمجھے عمرو کی گردن کرائے کے بوجھ سے آزاد نظرآتی ہے۔ فقیر، اﷲ تعالٰی اس کی مغفرت فرمائے، نے ان مباحث کو ایک تفصیلی فتوے میں پوری وضاحت کے ساتھ بیان کیاہے اس کامطالعہ کیاجائے، کیونکہ اس راستے میں لغزش کھانے والا پاؤں بہت نقصان دہ ہے اوریہ راستہ بہت مشکل اوردشوارہے پہلے حضرات کو اس معاملے میں بڑی دشواری پیش آئی ہے، ہرگروہ اپنی رائے پرخوش ہے، حق کا علم اس کے پاس ہے جو علوم کادینے والا اورہرراز کاجاننے والاہے۔ اﷲ تعالٰی ہمارے آقا ومولاچودھویں کے چاند محمدمصطفی اورآپ کی آل اورصحابہ کرام ہدایت کے چاندوں اورستاروں پررحمتیں نازل فرمائے۔آمین!(ت)