Brailvi Books
 |
فتاویٰ رضویہ جلد نمبر۲۴(کتاب الحظر والاباحۃ) |
65 - 160
مسئلہ ۱۰۲ : مرسلہ مصاحب علی طالب علم ۱۴ صفرالمظفر۱۳۳۵ ھ ایک شخص نے زناوشراب وسود وغیرہ گناہ کبیرہ کاارتکاب کیاہے اور نمازوروزہ وزکوٰہ وغیرہ افعال نیک بھی کرتاہے اور علماء ومشائخ سے محبت رکھتاہے تواگربہ سبب افعال نیک کے ایسے شخص سے محبت ودوستی ومیل جول رکھاجائے توان آیات اور احادیث کاخلاف لازم آتاہے جس میں فاسق سے بچنے اور دور رہنے اور بغض رکھنے کاحکم ہے اور اگربسبب افعال بد کے ایسے شخص سے پرہیزکیاجائے توان احادیث اور آیات کاخلاف لازم آتاہے جس میں مسلمانوں سے میل جول رکھنے اور اچھابرتاؤ کرنے کاحکم ہے توایسے شخص سے کیسابرتاؤ کیاجائے؟ بیّنواتوجروا۔
الجواب : دو وجہ سے محبت وبغض جمع ہوسکتے ہیں بلکہ فاسق سے بغض حقیقۃً اس کے فعل کی طرف راجح ہے، نہ ذات کی طرف۔ ایسے شخص سے برتاؤ میں طریقہ سلف مختلف رہا اس کامبنٰی اختلاف احوال ہے جس فاسق کو یہ جانے کہ نرمی وایتلاف سے رو براہ ہوجائے گا وہاں یہی چاہئے جسے یہ جانے کہ شدت واعراض سے متاثر ہوکرافعال قبیحہ چھوڑدے گا وہاں یہی چاہئے اور جس سے کسی طرح امید نہ ہو اس سے مطلقاً احترازچاہئے خصوصاً دوشخصوں کو، ایک وہ جو اس کی صحبت بد سے متاثرہونے کا اندیشہ رکھے دوسرا وہ کہ عالم ومقتداء ہوکہ اسے اس سے میل جول کرتاہوا دیکھ کرقلوب عوام سے فسق کی شناخت کم ہوگی۔ واﷲ تعالٰی اعلم
مسئلہ ۱۰۳ : مرسلہ دوست خان فیلبان ریاست سکیت ضلع کانگڑہ پنجاب ۲۲ ربیع الآخر۱۳۳۵ ھ ایک قوم پہاڑ میں چنڈیل کہلاتی ہے اس میں ان کے بڑے مسلمانوں سے ملتے جلتے تھے مگر اب یہ لوگ نہ ملتے ہیں نہ مردہ کی تجہیزوتکفین میں مسلمانوں کو بلاتے ہیں بلکہ مثل ہنود کے داڑھی مونچھ منڈواتے ہیں، نہ کسی مسلمان سے سلام علیک لیتے ہیں نہ کبھی نماز روزہ ہوتاہے۔ اب بعض مسلمان ان سے ملتے ہیں، جو ان سے ملتے ہیں ان کے واسطے کیاحکم ہے؟فقط
الجواب : یہ لوگ اگر اپنے آپ کومسلمان کہتے ہیں اور پھرکفر کرتے ہیں تومرتد ہیں اوران سے ملناجلنا مسلمان کو حرام ہے، جو مسلمان ان سے ملتے ہیں مستحق عذاب ہیں، اور اگر یہ لوگ سرے سے ہندو ہیں مسلمان ہوکرکافر نہ ہوئے تو ان سے کسی دنیاکے لین دین خریدوفروخت میں اُتنا ملناجائز ہے جتناہندو سے، اور اگر اس سے زائد ملیں اور اپنادوست ولی بنائیں توپھرمستحق عذاب ہیں بلکہ سخت تر، واﷲ تعالٰی اعلم۔