Brailvi Books

ابن خزیمہ نے اپنی صحیح میں حضرت عبدالرحمن ابن غنم کے حوالے سے تخریج فرمائی، فرمایا ملک شام میں طاعون کامرض پھوٹ پڑا تو حضرت عمروبن عاص رضی اﷲ تعالٰی عنہ نے فرمایا(لوگو!) یہ طاعون اﷲ تعالٰی کاعذاب ہے لہٰذا اس سے بھاگ کر وادیوں اور پہاڑی گھاٹیوں میں چلے جاؤ، پھر شرحبیل بن حسنہ رضی اﷲ تعالٰی عنہ کو یہ اطلاع پہنچی تو غضبناک ہوئے اور فرمایا عمروبن عاص نے غلط کہا ہے کیونکہ میں حضورصلی اﷲ تعالٰی علیہ وآلہٖ وسلم کے ساتھ رہاہوں لیکن عمرو تو زیادہ بھٹکاہوا ہے اپنے گھر کے اونٹ سے، بلاشبہہ یہ طاعون تمہارے نبی کی دعوت ہے اورتمہارے پروردگار کی رحمت اور تم سے پہلے نیک لوگوں کی وفات ہے(الحدیث) ابن عساکر حضرت عبدالرحمن بن غنم کے حوالے سے یوں کہتے ہیں اس نے فرمایا حضرت عمروبن عاص رضی اﷲ تعالٰی عنہ کو جب طاعون محسوس ہوا تو وہ انتہائی خوفزدہ ہوئے اور فرمایا(لوگو!) ان گھاٹیوں میں الگ الگ اور منتشرہوجاؤ کیونکہ تم پر اﷲ تعالٰی کا امر(عذاب) نازل ہوگیاہے اور میں اس کو عذاب یاطوفان ہی خیال کرتاہوں، حضرت شرحبیل بن حسنہ رضی اﷲ عنہ نے فرمایا ہم نے رسول اﷲ صلی اﷲ علیہ وآلہٖ وسلم کے ساتھ وقت گزاراہے تم تواپنے گھروالوں کے گدھے سے بھ زیادہ بھٹکے ہوئے ہو۔ حضرت عمرو رضی اﷲ تعالٰی عنہ نے فرمایا آپ نے سچ کہاہے۔ حضرت معاذرضی اﷲ تعالٰی عنہ نے حضرت عمرو بن عاص رضی اﷲ تعالٰی عنہ سے فرمایا آپ نے غلط کہا نہ یہ طوفان ہے اور نہ عذاب بلکہ یہ تمہارے پروردگار کی رحمت اور تمہارے نبی کی دعاہے اور تم سے پہلے نیک لوگوں کی موت ہے(الحدیث) امام طحاوی نے شرح معانی الآثار میں شعبہ کی حدیث یزیدبن حمیر کے حوالے سے روایت فرمائی، فرمایا میں نے حضرت شرحبیل بن حسنہ رضی اﷲ تعالٰی عنہ سے سنا کہ وہ حضرت عمروبن عاص رضی اﷲ تعالٰی عنہ کے حوالے سے بیان کرتے تھے، ملک شام میں طاعون واقع ہوا تو حضرت عمرو بن عاص نے لوگوں سے فرمایا کہ اس سے منتشرہوجاؤ اور بکھرجاؤ کیونکہ یہ عذاب ہے، جب شرحبیل بن حسنۃ تک یہ خبر پہنچی تو ارشادفرمایا میں رسول اﷲ صلی اﷲ تعالٰی علیہ وآلہٖ وسلم کی صحبت میں رہاہوں میں نے آپ کو یہ فرماتے ہوئے سناہے کہ وہ تمہارے رب کی رحمت، تمہارے نبی کی دعا اور تم سے پہلے نیک لوگوں کی موت ہے لہٰذا اس کے لئے جمع ہوجاؤ اور اس سے متفرق ومنتشرنہ ہو۔ اس پرحضرت عمرو بن عاص رضی اﷲ تعالٰی عنہ نے فرمایا سچ ہے۔ حدیث کے لئے ایک دوسرا طریق شہربن حوشب کے حوالے سے ہے چنانچہ اس میں فرمایا پھرشرحبیل بن حسنہ رضی اﷲ تعالٰی عنہ کھڑے ہوئے اور فرمایا خدا کی قسم میں اسلام لایا جبکہ تمہارا یہ امیر اپنے گھر کے اونٹ سے بھی زیادہ بھٹکاہواہے پھر دیکھو وہ کیاکہتاہے۔ حضور صلی اﷲ تعالٰی علیہ وآلہٖ وسلم نے ارشاد فرمایا جب طاعون کسی جگہ واقع ہوجائے اور تم وہاں موجود ہو  تو  وہاں سے نہ بھاگو کیونکہ موت تمہاری گردنوں میں لٹک رہی ہے، اور جب طاعون کہیں پھوٹ پڑے تووہاں نہ جاؤ کیوں وہ دلوں کو جلادیتاہے(ت)