مسئلہ ۴۲ تا ۴۶ : ازریاست ککینہ ضلع رنگ پور ملک بنگالہ مرسلہ مولوی عبداللطیف ہزاری ۳رمضان ۱۳۲۰ھ
کیافرماتے ہیں علمائے دین مسائل مفصلہ ذیل میں:
(۱) متصوفہ زمانہ جو مجلس سماع وسرود مرتب کرتے ہیں جس میں راگ و رقص ومزامیر ومعازف ہرقسم کے موجود رہتے ہیں اور جھاڑوفانوس وشامیانہ وفرش ودیگر تکلفات چشتیہ واسرافات بے جا کے علاوہ اہل ونااہل وصالح وفاسق وعالم وجاہل وہندو اور مسلمان وغیرہ کا کچھ تقید نہیں ہوتا سب کو اذن عام رہتاہے اور اطراف واکناف سے بذریعہ خطوط واشتہارات لوگوں کو بلایاجاتاہے آیا اس کاروائی کی قرآن وحدیث یافقہ وتصوف سے کوئی اصل اور حضرت شارع یاصحابہ یامجتہدین وائمہ شریعت وطریقت سے کوئی نقل قولی خواہ فعلی ثابت ہے یانہ، وبرتقدیرثانی اگر کوئی شخص اس کو مباح بلکہ مستحب اورمسنون وموجب تقرب الی اﷲ سمجھ کر ہمیشہ خود بھی مرتکب رہے اور دوسروں کو بھی راغب کرے حتی کہ اس کی تحریک سے بعض مقامات میں اس فعل کا چرچا شروع ہوجائے اور ہوتاجائے تو ایسا شخص ضال ومضل ٹھہرے گایانہیں؟
(۲) اس فعل کا منسوب کرنا طرف آنحضرت صلی اﷲ تعالٰی علیہ وسلم اور جمیع اکابرصحابہ وتابعین وائمہ مجتہدین و مشائخ طریقت کے نہایت درجہ کی گستاخی اور کذب علی الرسول وعلی الصحابہ العدول وعلی من بعدہم من الاکابرالفحول میں داخل ہے یانہ؟
(۳) جس ملک کے لوگ محض نو مسلم اوراحکام وارکان اسلام سے نہایت بے خبرہوں گویاابھی تک شریعت میں اُن کی بسم اﷲ بھی درست نہیں ہوئی اور بسبب قرب زمانہ جاہلیت وحدیث العہدبالاسلام ہونے اور مجاورت اقوام ہنود کے اکثرحق وباطل کی تمیزنہ رکھتے ہوں اور اعتقاداً وعملاً انواع شرک و بدعت میں گرفتار ہوں تو ایسوں کو اوّلاً عقائداسلامیہ واحکامات شرعیہ کی تلقین ضرورتر ہے یاسب سے پیشتر فن موسیقی اور حقائق ودقائق تصوّف ومسئلہ وحدۃ الوجود کی تعلیم مناسب ہے؟
(۴) ہرگاہ کہ ہرمسلمان پربقدراستطاعت امرمعروف ونہی منکرعموماً اورپیروپیشوائے قوم پرخصوصاً فرض ہے تو جس پیر کے اکثرمریدنامقید، عیاش طبع، نشہ خوار، مونچھیں دراز، ریش ندارد، اور صوم وصلاۃ وغسل وطہارت کے مقدمے میں غایت درجہ کے سست، ہاں ناچ رنگ وسماع وسرود کی خدمت میں چست ہوں اور وہ کسی کی کن مکن سے غرض نہ رکھے سب کو راضی رکھے اورسب سے راضی رہے، پس ایسا پیرتارکِ فرض او رعاصی ہے یانہ؟ اور وہ پیرکس قسم کاپیرکہلائے گا ہدایت وارشاد کا یا ضلالت والحاد کا؟
(۵) یہ کہنا کہ ویدہنود میں شرک نہیں ہنود کوبالقطع مشرک کہناصحیح نہیں، بتوں کوسجدہ کرنا ان کاباعث کفرنہیں ہوسکتا کہ یہ سجدہ تعظیمی ہے جیسے فرشتوں نے آدم کو کیاتھا اور بُتوں سے شفاعت کاامیدوار رہنا ایساہے جیسے اہل اسلام کا انبیاء سے امیدوارِشفاعت رہنا اورمشائخ نے اکثراذکاروافکارومراقبات جوگیان ہنود سے لئے ہیں، اس قسم کے ہفوات ہدایت وارشاد کے باب سے ہیں یادرپردہ بیخ کنی اسلام کے اسباب ہیں؟
