Brailvi Books
 |
فتاویٰ رضویہ جلد نمبر۲۴(کتاب الحظر والاباحۃ) |
123 - 160
مسئلہ ۲۴۶: ۷ شعبان المعظم ۱۳۱۹ھ کیافرماتے ہیں علمائے دین اس مسئلہ میں کہ اگرکسی کپڑے پرتصویریں چھپی ہوئی ہوں اس سے نماز پڑھنا جائزہے یانہیں؟ اور اس کو فروخت کرناجائزہے یانہیں؟ اور وہ تصویریں پرندوں کی ہوں۔ اور اگر اسی کپڑے کاکوئی عدد تیارہوگیا تو اس کاکیاکرناچاہئے اور وہ تصویریں جس میں جاندار زندہ رہ سکتاہے؟ بیّنواتوجروا۔واﷲ تعالٰی اعلم(ت)
الجواب: کسی جاندار کی تصویر جس میں اس کاچہرہ موجود ہو اور اتنی بڑی ہوکہ زمین پررکھ کرکھڑے سے دیکھیں تو اعضا کی تفصیل ظاہرہو، اس طرح کی تصویر جس کپڑے پرہو اس کاپہننا، پہنانا یابیچنا، خیرات کرنا سب ناجائزہے، اور اسے پہن کرنمازمکروہ تحریمی ہے جس کادوبارہ پڑھنا واجب ہے۔ ایسے کپڑے پرسے تصویرمٹادی جائے یا اس کاسریاچہرہ بالکل محوکردیاجائے۔ اس کے بعد اس کاپہننا، پہنانا، بیچنا، خیرات کرنا، اس سے نماز، سب جائزہوجائے گا۔ اگر وہ ایسے پکے رنگ کی ہوکہ مٹ نہ سکے دھل نہ سکے توایسے ہی پکے رنگ کی سیاہی اس کے سریاچہرے پراس طرح لگادی جائے کہ تصویر کااُتنا عضومحوہوجائے صرف یہ نہ ہوکہ اتنے عضو کارنگ سیاہ معلوم ہوکہ یہ محوومنافی صورت نہ ہوگا۔ واﷲ تعالٰی اعلم
مسئلہ ۲۴۷: مرسلہ محمدصدیق بیگ صاحب مرادآباد ازبریلی کیافرماتے ہیں علمائے دین اس مسئلہ میں کہ آج کل دنیامیں عام رواج مصوری کایہ ہے کہ بغیرقلم وروشنائی کے اور بغیر ہاتھ لگائے اس طرح پرتصویر بناتے ہیـں کہ ایک بکس سامان مصوری کاہوتاہے جس کو انگریزی میں کیمرہ میں لگاکر جس شیئ کی تصویرلینامقصود ہواس کوسامنے رکھتے ہیں شیشہ کے اثرسے کشش کے ساتھ تصویر معمولی شیشہ پرجو آتشی شیشہ یعنی لَینس کے پاس لگاہوتا ہے آجاتی ہے۔ اس کو انگریزی مصالحہ میں ڈال کر کاغذ پرلکھ کر خشک کرتے ہیں اس طرح سے تصویربن جاتی ہے۔ شرع شریف میں اس کی بابت کیاحکم ہے یعنی ایسی تصویر کھینچنے والے، کھنچوانے والے، رکھنے والے، فروخت کرنے والے، خریدنے والے کس حد تک گنہگار ہوسکتے ہیں اور جس مکان میں تصویریں ہوں وہاں نماز جائزہے یانہیں؟ یاشرع کے موافق اس میں کوئی گناہ نہیں ہے؟ جواب باصواب سے مطلع فرمائیں۔
الجواب: شرع نے تصویر حرام فرمائی اور کسی طریقہ ساخت کے ساتھ حکم کومقید نہ فرمایا، نہ کسی خصوصیت طریقہ کو اس میں دخل، نہ فوٹو بے اس کے عزم وفعل وحرکات کے خودبخود بن سکے، دستی وعکسی میں صرف تخفیف عمل کا فرق ہے جیسے پیادہ اور ریل۔ جہاں جاناشرعاً حرام ہے پیادہ وریل دونوں یکساں ہیں۔ وہ نہیں کہہ سکتا کہ اس میں مجھے پاؤں کو حرکت دینی نہ پڑی نہ منزل منزل ٹھہرتاگیا، بالجملہ تصویر عکس ودستی کے بنانے، رکھنے سب باتوں کے احکام قطعاً ایک ہیں اور فرق کی کوئی وجہ نہیں، عرف ہی کودیکھے، کیاجوتصویربنانی عرفاً توہین وبے حیائی اور قانونی جرم ہے وہ عکسی بناسکتاہے اور وہی عذر کرسکتاہے کہ بے قلم وروشنائی اور بے ہاتھ لگائے بنانی، ہرگزنہیں، توظاہرہوا کہ عکسی ہونے سے تصویر کے مقاصد میں کچھ فرق نہیں آتا بلکہ بسااوقات کچھ زیادت ہی ہوجاتی ہے اور شیئ اپنے مقاصد ہی کے لحاظ سے ممنوع یامشروع ہوتی ہے،