Brailvi Books

جوکچھ تمہاری زبانیں جھوٹ بیان کرتی ہیں، اس کے متعلق یہ نہ کہاکرو کہ یہ حلال ہے اور یہ حرام، تاکہ تم اﷲ تعالٰی کے ذمے جھوٹ لگاؤ، بے شک جو اﷲ تعالٰی پرجھوٹ باندھتے ہیں یعنی اس کے ذمے جھوٹ لگاتے ہیں وہ کبھی کامیاب اور بامرادنہیں ہوسکتے۔(ت)

(۱؎ القرآن الکریم     ۱۶/ ۱۱۶)

اس پرتوبہ فرض ہے، اگرتوبہ نہ کرے اور اپنے ان احوال وحرکات سے باز نہ آئے تووہی اس کامستحق ہے کہ مسلمان اسے مسجد میں نہ آنے دیں۔

درمختارمیں ہے:

وکذا یمنع منہ کل موذ ولوبلسانہ۱؎۔ واﷲ تعالٰی اعلم۔

اسی طرح ہرتکلیف دینے والے کو خواہ زبانی ہی ہو اسے مسجد روک دیناچاہئے۔ واﷲ تعالٰی اعلم(ت)

(۲؎ درمختار         کتاب الصلوٰۃ     باب مایفسد الصلوٰۃ     مطبع مجبتائی دہلی     ۱/ ۹۴)

مسئلہ ۲۳۷ تا ۲۴۱ : کیافرماتے ہیں علمائے دین ان مسائل میں کہ:

(۱) حقہ جائزہے یانہیں؟ مولوی پاک بتلاتاہے۔

(۲) تصویرکارکھنابناناجائزہے یانہیں اورجائزکرنے والے پرکیاحکم ہے؟

(۳)گاناسنناجائزہے یانہیں؟ مزامیر باجے کے ساتھ یاشادی یاسنت (ختنہ) وغیرہ میں جائزہے یانہیں یعنی بچہ کی سنت وغیرہ میں؟

(۴) ایک مولوی پیش امام نے یہ فتوٰی دیاہے کہ رسول اﷲ صلی اﷲ تعالٰی علیہ وسلم نے کھڑے کھڑے پیشاب کیاتھا اورجائزہے۔

(۵) تعزیہ داری جائزہے یانہیں؟ اورایک مولوی نے ان سب کو جائزکردیاہے۔

الجواب

(۱) حقہ جائزہے مگردَم لگانا جس سے حواس میں فرق آتاہے حرام ہے، حقہ کاپانی شریعت کے نزدیک پاک ہے اسے ناپاک کہنے والا شرع پرافتراکرتاہے۔ 

(۲) جاندارکی تصویر بنانا مطلقاً حرام ہے، جو اسے جائز کہے شریعت پرافتراء کرتاہے گمراہ ہے مستحق تعزیروسزائے نار ہے رکھناتین صورتوں میں جائزہے: ایک یہ کہ چہرہ کاٹ دیاہو یابگاڑ دیاہو۔ دوسرے یہ کہ اتنی چھوٹی ہوکہ زمین پررکھ کر کھڑے ہوکردیکھیں تو اعضاء کی تفصیل نظرنہ آئے۔تیسرے یہ کہ خواری وذلت کی جگہ پڑی ہو جیسے فرش پاانداز میں ورنہ رکھنابھی حرام، ہاں غیرجاندار مثل درخت ومکان کی تصویر کھینچنا رکھناسب جائزہے۔

(۳) مزامیر حرام ہیں، بغیر باجے کے سادہ گانا سنت وغیرہ کی شادی میں جائزہے جبکہ نہ اندیشہ فتنہ ہو نہ خفیف الحرکاتی۔

(۴) کھڑے ہوکر پیشاب کرنابدتہذیبی وبے ادبی وسنت نصرانی ومکروہ ومنع ہے، حضوراقدس نے ایک باردرد کے عذر سے ایساکیا وہ بھی بڑے اہتمام کے ساتھ، اور صریح حدیث میں اسے منع فرمایا۔

(۵) تعزیہ داری ناجائزہے۔ واﷲ تعالٰی اعلم

مسئلہ ۲۴۲: ازبیکانیرمارواڑہ  محلہ مہاوتان مرسلہ قاضی قمرالدین ۹ربیع الاول شریف ۱۳۳۸ھ

کیافرماتے ہیں علمائے دین اس مسئلہ میں کہ پان کھانا سنت ہے یاکیا؟ بیّنواتوجروا (بیان فرمائیے اجرپائیے۔ت)

الجواب : پان کھانا نہ سنت ہے نہ مستحب صرف مباح ہے، ہاں بعض عوارض خارجیہ کے باعث مستحب ہوسکتاہے جیسے نہ کھانے میں میزبان کی دل شکنی ہو یابوسہ زوجہ کے لئے منہ کو خوشبودارکرنے کی نیت سے 

بلکہ واجب بھی جیسے ماں باپ حکم دے اورنہ ماننے میں اس کی ایذا ہویونہی عارض کے سبب مکروہ بھی ہوسکتاہے جیسے تلاوت قرآن مجید میں بلکہ حرام بھی جیسے نمازمیں۔واﷲ تعالٰی اعلم

مسئلہ ۲۴۳: ازپنڈول بزرگ ڈاکخانہ رائے پور ضلع مظفرپور نعمت شاہ خاکی بوڑاہ 

پان، چونا اور حقہ اور تمباکو اور سرتی کھاناکیساہے؟

الجواب : پان کھاناجائزہے اور اُتنا چُونا بھی کہ ضرر نہ کرے اوراتناتمباکو بھی کہ حواس پراثرنہ آئے، یہاں سرتی تمباکو ہی کہتے ہیں۔ واﷲ تعالٰی اعلم