Brailvi Books
 |
فتاویٰ رضویہ جلد نمبر۲۳(کتاب الحظر والاباحۃ) |
91 - 190
رسالہ الکشف شافیا حکم فونو جرافیا (۱۳۲۸ھ) (فونوگراف (گراموفون) کے حکم کے بارے میں تسلی بخش وضاحت)
مسئلہ۱۷۳ : از ریاست رامپور محلہ چاہ شور ۱۲ رمضان مبارک ۱۳۲۸ھ بسم اللہ الرحمن الرحیم کیا فرماتے ہیں علمائے دین اس مسئلہ میں کہ فونو گراف سے قرآن مجید سننا اور اس میں قرآن شریف کا بھرنا اور اس کام کی نوکری کرکے یا اجرت لے کر یا ویسے ہی اپنی تلاوت کا اس میں بھروانا جائز ہے یا نہیں اور اشعار حمد ونعت کے بارہ میں کیا حکم ہے اور عورات کے ناچ گانے یا مزامیر کی آوازاس سے سننا بھی ایسا ہی حرام ہے جس طرح اس سے باہر سننا یا کیا؟ بینوا توجروا (بیان فرماؤ اجر وثواب پاؤ۔ ت)
الجواب: الحمد ﷲ الذی انزل القراٰن ذکراللعلمین، واغنانا بہ عن الغنا الخبیث ولھو الحدیث وملاھی المبطلین وحرم بغیرتہ ورحمتہ الفواحش والفتن ماظھر منھا وما بطن والصلٰوۃ والسلام علی سیدنا ومولٰنا محمد سید المرسلین المبعوث بزھق المعازف والمزامیر وکل لھو مھین وعلی الہ وصحبہ الذین ھم لعھدھم بتعظیم الذکر راعون وبلا طمع اجرۃ ولا کراموفون المنتجبین والمجتنبین عن لھو الحدیث الذین میزاﷲ بسعیھم و رعیھم الطیب من الخبیث مااطرب الورقاء بالالحان وغر القرٰی فی الافنان اٰمین !۔
سب تعریف اللہ تعالٰی کے لئے ہے کہ جس نے تمام جہانوں کی پند ونصیحت کے لئے قرآن مجید نازل فرمایا اور اس کی برکت سے ہمیں خبیث گانوں، کھیل کی باتوں اور اہل باطل کے کھیل وتماشوں سے بے نیاز کردیا اور اپنی غیرت اور رحمت کی وجہ سے فحش (یعنی بیحیائی کے کام) اور کھلے اور پوشیدہ فتنے حرام کردئیے اور درود وسلام ہمارے آقا ومولٰی پر ہو جو محمد (کریم) تمام رسولوں کے سردار اور مقتدا ہیں کہ جن کو گانے بجانے کے آلات واسباب اور ہر ذلیل کھیل وتماشہ کے مٹانے اور ختم کرنے ) کے لئے بھیجا گیا (نیز درود وسلام) ان کی تمام آل اور تمام ساتھیوں پر ہو کہ جو تعطیم ذکر کی وجہ سے اپنے عہد وپیمان کی رعایت کرتے رہے اور یہ بغیر لالچ اجرت اور کرایہ کے عہد پورا کرتے ہیں اور شرافت رکھنے والے اور کھیل کی باتوں سے بچنے والے تھے،یہ وہ پاکیزہ لوگ تھے کہ جن کی کوشش اور رعایت کرنے سے اللہ تعالٰی نے پاک کو ناپاک سے الگ اور جدا کردیا (اور یہ سلسلہ اس وقت تک جاری رہے) جب تک فاختائیں خوش الحانی سے بولتی رہیں اور قمریاں شاخوں پر (جھوم کر) گیت گاتی اور خوش آوازی کرتی ہیں یا اللہ! اس دعا کو شرف قبولیت سے نواز دے۔ (ت) اس مسئلہ حادثہ میں کلام سے پہلے ایک مبحث جلیل کی تمہید ضرور جس پر انکشاف احکام مقصور، وہ فوٹوگراف سے فونوگراف کا اظہار فرق ہے فوٹو گراف کی تصویر اپنی ذی الصورہ سے مباین اور اسکی محض ایک مثال وشبیہ ہوتی ہے بخلاف اس آلہ کے کہ اس میں اگر کسی قاری کی تلاوت بھری گئی تو اس میں حقیقۃً قرآن عظیم ہی ودیعت ہوا اور اس سے جو سنا جائے وہ حقیقتاً اسی قاری کی آواز ہوگی اور اس سے جو ادا ہوا وہی قرآن عظیم ہوگا جو اس نے پڑھا نہ یہ کہ مسموع اس کی آواز کی کوئی حکایت وتصویر ہو اوریہ جو ادا ہوا قرآن مجید میں نہ ہو اس کی مثال ونظیر ہو، یوہیں اگر آلات طرف وغیرہا کی آواز ہے تو وہ بھی حقیقۃً وہی آواز ہے نہ کہ اس کا نشان وپرداز۔