Brailvi Books

مسئلہ ۱۱۵ : از کلکتہ دھرم تلا ۱۲۴ مرسلہ جناب محمد یونس صاحب ۸رجب ۱۳۲۷ھ

علمائے دین سے سوال یہ ہے کہ اس شخص کا کیاحال ہے کہ عمرو دو زوجہ رکھتا ہے اور دونوں سے مباشرت ایک مکان میں بے پردہ کرتا ہے اور جو اس سے کہا جاتاہے تو کہتا ہے اپنی بی بی سے کیا حجاب۔

الجواب : یہ امر مکروہ وبے حیائی ہے مرد کو بی بی سے حجاب نہیں تو بی بی کو بی بی سے تو ستر فرض ہے اور حیا لازم ہے۔ بحرالرائق وفتاوٰی عالمگیریہ میں ہے :

یکرہ ان یطأ احدھما بحضرۃ الاخرٰی حتی اوطلب وطاھألم یلزمھا الاجابۃ ولا تصیر فی الامتناع ناشرۃ ولا خلاف فی ھذہ المسائل ۱؎۔

دو بیویوں میں سے کسی ایک سے دوسری کی موجودگی میں ہمبستری کرنا مکروہ ہے اگر شوہر ایک بیوی سے دوسری بیوی کی موجودگی میں اس قسم کا تقاضا کرے تو بیوی کے لئے اس کا تقاضا پورا کرنا ضروری نہیں، اور اس انکار یا رکاوٹ کے سبب وہ نافرمان نہیں ہوگی۔ ان مسائل میں کوئی اختلاف نہیں پایا جاتا۔ (ت)

 (۱؎ بحرالرائق     کتاب النکاح    باب القسم    ایچ ایم سعید کمپنی کراچی    ۳ /۲۲۱)

(فتاوٰی ہندیہ     کتاب النکاح    الباب الحادی عشر    نورانی کتب خانہ پشاور    ۱ /۳۴۱)

ردالمحتار شرح ملتقی اس میں امام قاضیخاں اس میں منتقی امام حاکم الشہید سے ہے :

یکرہ للرجل ان یطأ امرأتہ وعندھا صبی یعقل او اعمٰی اوضرتھا اوامتھا او اٰمتہ ۲؎۔

کسی ذی عقل وذی فہم بچے ، کسی اندھے، اپنی بیوی کی سوکن اور اپنی یا بیوی کی لونڈی کی موجودگی میں بیوی کے ساتھ ہمسبتر ہونا مرد کے لئے مکروہ ہے۔ (ت)

 (۲؎ردالمحتار      کتاب النکاح    با ب القسم         داراحیاء التراث العربی بیروت    ۲ /۴۹۲)

مسئلہ ۱۱۶ : بہیڑ ضلع بریلی مرسلہ طابل حسین خان     ۲۷ ذی الحجہ ۱۳۲۲ھ

قبر پر اذان کہنا جائز ہے یانہیں؟ بینوا توجروا (بیان کیجئے اور ثواب حاصل کیجئے۔ ت)

الجواب : قبر پر اذان کہنے میں میت کا دل بہلتا اور اس پر رحمت الٰہی کا اترنا اور سوال جواب کے وقت شیطان کا دور ہونا اور ان کے سوا اور بہت فائدے ہیں جن کی تفصیل ہمارے رسالہ ''ایذان الاجر فی اذان القبر'' میں ہے۔ واللہ تعالٰی اعلم۔

مسئلہ ۱۱۷ تا ۱۲۰ :  کیا فرماتے ہیں علمائے دین ان مسائل میں:

(۱) زید فجر کے بعد پانچ بجے کے مسجد میں چراغ بغرض رونق وزینت مسجد ، نہ کہ بغرض تلاوت اور مطالعہ کتب دینیہ جلادیتاہے حالانکہ روشنی کی اس وقت ضرورت نہیں ہوتی ہے کیونکہ نمازیوں کی آمد پونے چھ بجے اور جماعت بعد چھ بجے طلوع روشنی صبح صادق میں ہوتی ہے اور علاوہ اس کے سرکاری لالٹین کی روشنی تینوں دروں میں مسجد کے اور صحن میں کافی طور سے ہوتی ہے عمرو جو مہتمم قدیم مسجد کا ہے اور سیکڑوں روپیہ اپنی کوشش موفورہ سے فراہم کرکے مسجد کی ترمیم ودیگر اخراجات میں لگاتارہا ہے بلکہ اب بھی مرمت کرارہا ہے زید کو اس وقت کے فضول بلا ضرورت چراغ جلانے سے منع کرتا ہے اور کہتاہے کہ مسجد کے مال میں اسراف نہ چاہئے مگر زید نہیں مانتا پس ایسی صورت میں چراغ جلانا چاہئے یا نہیں؟

(۲) زید نے مسجد کی مرمت کے نام سے مسلمانوں سے کچھ چندہ جمع کیا اور عمرو مہتمم سے بھی دس روپیہ مرمت کے بہانے سے لئے جو اس کے پاس مرمت مسجد کے لئے رکھے تھے اس روپیہ سے اپنے چچا کی قبر جو مسجد سے باہر تھی پختہ بنواکر مسجد کے اندر داخل کرلی اور بقیہ روپیہ خورد ونوش کرلیا حساب نہیں سمجھا یا مسجد کی مرمت کا روپیہ قبر یا اپنے صرف میں لانا کیساہے اور وہ شخص شرعا کسی مواخذہ کے قابل ہے؟ بینوا توجروا۔

(۳) زید کہتا ہے کہ تلاوت قرآن مجید مسجد کے اندر گناہ ، نہیں چاہئے۔ عمرو کہتا ہے کہ گناہ نہیں ہے۔ اگر جماعت ہوتی ہو یا کوئی نماز پڑھتا ہو تو دل میں آہستہ پڑھنا اور جبکہ یہ امر مانع نہ ہوں تو بآواز پڑھنا بھی جائز ہے گناہ نہیں، زید کا قول درست ہے یاعمرو کا؟ بینوا توجروا

(۴) زید اپنا اثاث البیت مسجد کے حجرہ میں رکھ لیتا ہے جس سے مسجد کے اسباب کو پراگندگی اور مسافروں اور طلباء کو تکلیف ہوتی ہے اور بہنوئی اس کا اکثر اوقات مسجد کے اندر سورہتا ہے یہ فعل زید کا کیسا ہے؟ بینوا توجروا

الجواب

(۱) جبکہ اس وقت مسجد میں کوئی نہیں آتا چراغ جلانا فضول وممنوع ہے خصوصا جبکہ لالٹین کی روشنی ہوتی ہے۔ واللہ تعالٰی اعلم۔

(۲) مسجد کے روپیہ سے اپنے چچا کی قبر پکی بنانا حرام تھا اور دھوکا دے کر لینا اور بھی سخت حرام، ایسا شخص فاسق فاجر مرتکب کبائر ہے۔ واللہ تعالٰی اعلم۔

(۳) زید کا قول غلط ہے مسجد میں قرآن عظیم کی تلاوت بیشک جائز ہے اور کسی کے نماز وظیفہ میں خلل نہ آئے تو بآواز پڑھنا بھی جائز ہے۔ واللہ تعالٰی اعلم۔

(۴) مسجد کاا سباب پر اگندہ اور مسافروں اور طلباء کوناحق تکلیف دینا حرام ہے۔ اور بے اعتکاف کے مسجد میں سونے کی اجازت نہیں۔ واللہ تعالٰی اعلم۔