Brailvi Books
 |
فتاویٰ رضویہ جلد نمبر۲۳(کتاب الحظر والاباحۃ) |
169 - 190
مسئلہ ۳۳۴ تا ۳۳۶ : ازملک گجرات علاقہ احمدآباد مقام برمگام جامع مسجد غلام محی الدین ۴شوال المعظم ۱۳۳۴ھ علمائے شرع متین کی خدمت میں چند سوالات عرض کئے جاتے ہیں: (۱) ایک شخص نے مدرسہ فخراً وحسداً قائم کیاہے کہ سابق اس کے سے ایک مدرسہ جاری تھا جو حسبۃً ﷲ عموماً استفادہ عباداﷲ کے لئے قائم کیاگیاتھا تو اس کے شکست ونیست ونابود کرنے کی غرض سے یہ ثانی مدرسہ بنایاکہ اس مدرسہ قدیمہ میں کوئی نہ پڑھے اور بند ہوجائے حالانکہ مدرسہ ثانیہ کی ضرورت نہ تھی، آیا اس طور سے اور اپنی اغراض نفسانی اور حطام دنیوی سے مدرسہ قائم کرناجائزہے؟ (۲) ایک شخص منکرقیامت اور تارک الجماعت اور منکرجمعہ ہے باوجود ان اعتقادات کے تعلیم وتعلم گجراتی اور انگریزی میں ترقی اور دینی علوم میں تنزل پسند کرنے والا شخص ہے تو اگر ایساشخص مدرسہ قائم کرے تو اس میں دینی تعلیم وتعلم جائزہے یانہیں، اور اخلاق بگڑنے کے خوف سے احتراز لازم ہے یانہیں؟ (۳) ایک شخص شریر اور فتنہ انگیز اور فقہائے کرام کی کتابوں کامنکراورفعل لواطت کاقائل بلکہ زانی بھی ہے تو ایسے مدرس کے پاس اپنی اولاد کوپڑھانادرست ہے یانہ؟ اور اس شخص کاکیاحکم ہے؟ اجیبوا بماھوصواب۔
الجواب (۱) اگرواقع یہی ہے کہ پہلامدرسہ تعلیم دین مطابق مذہب اہلسنت وجماعت کے لئے کافی ووافی تھا اور اس پرعقداً وعملاً کوئی اعتراض شرعی نہ تھا تو اس کے قرب میں دوسرا مدرسہ محض بلاحاجت قائم کرنا عبث بلکہ تفریق قوت ہے لیکن اگرحالت یہ ہے جوسوال میں لکھی تویہ مدرسہ اس مدرسہ کے توڑنے اور ضررپہنچانے کے لئے قائم کیاگیا اور پہلا مدرسہ واقعی خالص مدرسہ اہلسنت وجماعت مطابق شریعت ہے، تو اس نیت نامحمود کے ساتھ یہ جدید مدرسہ مسجد ضرار کے حکم میں ہوگا اور اس کے اہل پر اس کا بند کردیناواجب۔
قال صلی اﷲ تعالٰی علیہ وسلم لاضررولاضرار فی الاسلام۱؎۔ واﷲ تعالٰی اعلم۔
حضوراکرم صلی اﷲ تعالٰی علیہ وسلم نے فرمایا: اسلام میں ضرر اور ضرار دونوں نہیں۔ واﷲ تعالٰی اعلم۔