الجواب : یہ مسئلہ بہت طویل الذیل ہے جس کی تفصیل کو دفتر درکار، یہاں اس کے بعض صور وضوابط، پراقتصار۔
فاقول: وباﷲ التوفیق (میں اﷲ تعالٰی کی توفیق کے ساتھ کہتاہوں۔ت) کسب کے لئے ایک مبدء ہے یعنی وہ ذریعہ جس سے مال حاصل کیاجائے، اور ایک غایت یعنی وہ غرض کہ تحصیل مال سے مقصود ہو، ان دونوں میں ذاتاً خواہ عارضاً احکامِ نہ گانہ، فرض، واجب، سنت، مستحب، مباح، مکروہ، مکروہ تنزیہی، اساءت، مکروہ تحریمی،حرام سب جاری ہیں، اور دونوں کے اعتبار سے کسب پر احکام مختلفہ طاری ہیں، نفس کسب بے لحاظ مبادی وغایات کوئی حکم خاص نہیں رکھتا۔
ذرائع میں حرام: جیسے غصب ورشوت وسرقہ وربا، یوہیں زنا وغنا وحکم خلاف ماانزل اﷲ وغیرہ امورِ محرمہ کی اجرت، تلاوتِ قرآن ووعظ وتذکیر ومیلاد خوانی وغیرہا عبادات بیچ کر اسی طرح جملہ عقود باطلہ وفاسدہ قطعیہ۔
مکروہِ تحریمی: جیسے اذانِ جمعہ کے وقت تجارت۔
