Brailvi Books
 |
فتاویٰ رضویہ جلد نمبر۲۲(کتاب الحظر والاباحۃ) |
11 - 146
مسئلہ ۲۲: از کلکتہ دھرم تلا نمبر ۶ مرسلہ جناب مرزا غلام بیگ صاحب ۹/ ذی القعدہ ۱۳۱۱ھ کیافرماتے ہیں علمائے دین اس مسئلہ میں کہ سونے ، چاندی ،گلٹ ،ریشم کی چین گھڑی میں لگانا اور اسے لگا کر نماز پڑھنا کیسا ہے ؟ بینوا توجروا (بیان فرماؤ تاکہ اجر پاؤ۔ت) الجواب سونے یا چاندی کے چین تومطلق منع ہے اگر چہ انگرکھے میں نہ لگائی جائے صرف کھونٹی میں لٹکائیں یا گھڑی کے بکس ہی میں گھڑی رکھیں، اور جو چیز ممنوع ہے اس کے ساتھ نماز میں کراہت آئے گی، اور گلٹ میں اگر چاندی زائد یا برابرہے تو اس کا حکم بھی چاندی کا ہے۔ اور اگر تانبا غالب ہے تو اس میں اور ریشم کی چین میں میں جبکہ وہ انگر کھے میں نہ لگائی جائیں کوئی حرج نہیں۔ رہا انگر کھے میں لگانا اگر یہ لگانا پہننے کے مشابہ ٹھہرے تو مکروہ ہوگا اور اس سے نما ز بھی مکروہ کہ پہننا تانبے اور ریشم کا ممنوع ہے اور جو ممنوع کے مشابہ ہے مکروہ ہے۔ اور اگر پہننے کے مشابہ نہ ٹھہرے تو نہ اس میں حرج نہ نماز میں کراہت، علامہ شامی رحمۃ اللہ تعالٰی علیہ کا کلام اسی طرف ناظر کہ یہ پہننے سے مشابہ نہیں مگر فقیر کو اس میں تامل ہے اور وہ خود بھی اس پر جزم نہیں رکھتے اور اسے لکھ کر تامل کاحکم فرماتے ہیں توبہتر ہے اس سے احتراز ہی ہے۔ واللہ تعالٰی اعلم۔
مسئلہ ۲۳ و ۲۴: ا زکلکتہ دھر م تالہ نمبر ۶ مرسلہ جناب مرز اغلام قادر بیگ صاحب ۸ رمضان ۱۳۱۰ھ کیا فرماتے ہیں علمائے دین ان دو مسئلوں میں : (۱) ٹوپی جس پر ریشم یا کلابتوں کا کام ایسا ہو جس نے نصف سے زائد کپـڑا چھپا لیا ہواس کا پہننا جائز یا حرام اور جس کا تمام کپڑا چھپا لیا ہوا س کی نسبت کیاحکم ہے؟ (۲) ازار بند ریشم کا مرد کو جائز یا حرام اور اس کے پاجامہ میں ہونے سے نماز کا کیا حال ؟
الجواب (۱) مغرق کہ تمام کپڑا کام میں چھپ گیا ہو یا ظاہر ہو تو خال خال کہ دور سے دیکھنے والے کو سب کام ہی نظرآئے مطلقا ناجائز ہے اگر چہ وہ ٹوپی عرض میں جارہی انگل یا اسسے بھی کم ہو یونہی اگر اس میں کوئی بیل بوٹا چاراُنگل عرض سے زائد ہو تو بھی ناجائز اگر چہ سارے کپڑے میں صرف یہی ایک بوٹی ہو، اور اگر یہ دونوں باتیں نہیں تو مطلقا جائز اگر چہ نصف سے زائد کپڑا کاام میں چھپا ہوا گرچہ متفرق بوٹیاں جمع کرنے سے چار اُنگل عرض سے زائدکو پہنچے۔
کل ذٰلک محقق فی فتاوٰنا مستفادا من ردالمحتار وغیرہ من الاسفار۔ واﷲ تعالٰی اعلم۔