Brailvi Books
 |
فتاویٰ رضویہ جلد نمبر۲۱(کتاب الحظر والاباحۃ ) |
137 - 144
مسئلہ ۲۳۸ : از نجیب آباد ضلع بجنور مسئولہ جناب محمد احمد حسین خاں صاحب ۷ ذی الحجہ ۱۳۲۹ھ کسی شخص کی ضیافت خواہ مسلمان ہو خواہ کافرنہ کرنی چاہئے اور کس شخص کی نامنظور کرنی چاہئے اور کیوں؟ بینوا توجروا
الجواب : مرتد کی نہ دعوت کرے نہ اس کی دعوت میں جائے نہ اس سے کوئی معاملہ میل جول کا رکھے، یونہی کفار خصوصا وہ جو ذمی یعنی سلطنت اسلامیہ میں رہ کر مطیع الاسلام نہ ہوں ان سے بھی کوئی برتاؤ محبت ودوستی کا نہ کرے ہاں مصلحت شرعیہ ہو تو اس کی دعوت کرے بھی اورکھائے بھی جس کی بد مذہبی حدکفر تک نہ پہنچی ہو اور بلا مصلحت اس سے کیا فاسق معلن بیباک سے بھی بچے خصوصا مضرت دینی کا خوف ہو جب تو احتراز سخت لازم ہوگا مثال یہ ہے کہ ایک شخص کے یہاں شادی میں ناچ یا ناجائز باجا ہے وہ اسے بلاتا ہے اور یہ جانتاہے کہ میں جاؤں گا تو اسے روک سکوں گا اسے میرا کہنا ضرور ماننا ہوگا تو بالقصد جائے اور اگر سمجھے کہ میں اپنا شریک ہونا ممنوعات کے نہ ہونے پر موقوف کردوں کہ اگر یہ باتیں نہ کروں تو آؤں گا تو اسے میری ایسی خاطر ہے کہ ان باتوں سے باز رہے گا توہرگز نہ جائے جب تک وہ منہیات ترک نہ کردے۔ دوسری مثال اس سے میل جول نرم برتاؤ رکھنے میں امید ہے کہ یہ راہ پر آجائے اس کا دل نرم ہے حق قبول کرلے گاتو حد جائز تک آشتی برتے اور جانے کی میل جول میں مجھے اندیشہ ہے کہ اس کی محبت اثر کر جا ئے تو آگ سمجھے دور بھاگے عام لوگوں کو اسی اخیر صورت کالحاظ چاہئے۔
ولہذا حدیث میں صاف فرمایا :
ایاکم وایاھم لایضلونکم ولا یفتنونکم ۱؎۔ والعیاذ باﷲ تعالٰی۔ واﷲ تعالٰی اعلم وعلمہ جل مجدہ اتم واحکم۔