Brailvi Books
 |
فتاویٰ رضویہ جلد نمبر۱۷(کتاب البیوع، کتاب الحوالہ، کتاب الکفالہ ) |
73 - 180
مسئلہ ۱۶۳ : از شہر بریلی محلہ ملوک پور مسئولہ عبدالغنی صاحب تاجر ۱۳ذیقعدہ ۱۳۳۷ھ کیافرماتے ہیں علمائے دین اس مسئلہ میں کہ محبوب اﷲ کی دکان ایک بقال کے پاس چار سور وپیہ میں رہن ہے اور محبوب اللہ فی صدی ایک روپیہ ماہوار سود کا ادا کرتے ہیں اب ایک شخص محبوب اﷲ کی دوسری دکان میں مبلغ دس روپیہ کرایہ پر بیٹھتا ہے محبوب اﷲ اس کرایہ دار سے کہتا ہے کہ مجھ کو تم چار سو روپیہ دے دو میں بقال کو ادا کردوں گا اور تم چار سو روپیہ کی دستاویز تحریر کرالو میں تم کو کرایہ میں کمی کردوں گا اس صورت میں جائز ہے یانہیں ؟
الجواب :اگر ہمیشہ کےلئے کمی کردے اور صاف صاف قرض میں تحریر کردیں کہ کچھ نفع اس پر لیا دیا نہ جائیگایہ کمی صرف اس احسان کے بدلے میں احسان ہو قرض کا منافع نہ ہو تو حرج نہیں ۔ واﷲ تعالٰی اعلم۔
مسئلہ ۱۶۴: از ریودر براہ آبو مرسلہ ٹھیکیدار آنول موسی منشی صاحب ۱۴/رجب ۱۳۳۷ھ کیافرماتے ہیں علمائے دین ا س مسئلہ میں کہ اناج کا بدلنا بھی دوسرے اناج سے جائز ہے یانہیں ؟ مثلاً مکی ایک من دوماہ پہلے دی بعد میں دوماہ کے ایک من گندم لیتے ہیں ، اس شرط سے لین دین یہاں کے مسلمان کرتے ہیں ، یہ بدلنا بھی جائز ہے یانہیں ؟
الجواب:ایک ناج دوسرے ناج سے نقد بدلنے میں کوئی حرج نہیں اور جب جنس بدلی ہوئی ہے تو کمی بیشی جائز ہے اور ایک طرف سے اب دیا گیا اور دوسری طرف سے ایک مدت کے بعد دینا ٹھہرا تو یہ بیع سلم کے شرائط کا محتاج ہے ، واﷲ تعالٰی، اعلم