Brailvi Books

وہ جو عقد سلم کے وثیقہ میں لکھا جاتاہے کہ اس سال کی جدید (گندم) تو یہ جدید کے موجود ہونے سے مفسد عقد ہے لیکن اس کے موجود ہونے کے بعد صحیح ہے۔ (ت)

 (۱؎ درمختار    کتاب البیوع باب السلم        مطبع مجتبائی دہلی    ۲ /۴۸)

(بحرالرائق    کتاب البیع باب السلم        ایچ ایم سعید کمپنی کراچی    ۶ /۱۶۰)

اور اس تیاری وغیر تیاری میں کچھ گاؤں یا پرگنہ یا ضلع کااتحاد بھی شرط نہیں بلکہ اگر اس ضلع بھرمیں ابھی کہیں رس بلکہ گنا بھی تیار نہیں اوردوسرے ضلع میں رس بکنے لگا ہے تو جہاں ہنوز معدوم ہے وہاں والے بھی بیع سلم کرسکتے ہیں جبکہ ان دونوں ضلعوں میں اتنابعد عظیم نہ ہو کہ ان کے یہاں کی ایکھ ماری جائے یا رس پرکوئی افت آئے تو وہاں سے رس منگا کر دینے میں سخت شدید مشقت ہو جیسے ہندوستان میں ابھی مفقود ہے اور مثلا مصر یا برہما میں تیار ہوگیا تو ایسی تیاری پر ہندوستان میں اس کی بیع سلم حلال نہیں،

درمختارمیں ہے :

لوانقطع فی اقلیم دون آخر لم یجز فی المنقطع ۱؎۔

اگر ایک ملک میں مسلم فیہ نایاب ہے دوسرے میں نہیں ہے تو جہاں نایاب ہے وہاں سلم جائز نہیں۔ (ت)

 (۱؎ درمختار    کتاب البیوع   باب السلم        مطبع مجتبائی دہلی    ۲ /۴۷)

ردالمحتارمیں ہے :

ای المنقطع فیہ لانہ لایمکن احضارہ الابمشقۃ عظیمۃ فیعجز عن التسلیم، بحر ۲؎۔

یعنی جس ملک میں نایاب ہے کیونکہ سوائے سخت مشقت کے وہاں سے لانا ممکن نہیں لہذا تسلیم سے عجز لازم آئے گا۔ بحر۔ (ت)

(۲؎ ردالمحتار   کتاب البیوع   باب السلم        داراحیاء التراث العربی بیروت     ۴ /۲۰۵)

یہ سب اس صورت میں ہے کہ واقع میں وہ عقد بیع شرعی ہو بعض دستاویزیں رس کی جوآج کل دیکھنے میں آئیں ان کا مضمون یہ ہے کہ (جو کہ مبلغ اس قدر یا فتنی فلان بن فلاں کے میرے ذمہ واجب الادا ہیں اقرار کرتاہوں اور لکھے دیتاہوں کہ بعض مبلغان مذکور کے مال اس کا شت ۱۳۰۰؁ ف جس کا پیداوار ۱۳۰۱؁ ف میں ہوگا وقت تیار ہوجانے بیل کے اس نرخ سے فلاں ماہ تک ادا کروں گا اپنے خرچ میں کسی طرح نہ لاؤں گا) اور سنا گیا کہ عام دستاویز اسی مضمون کی ہوتی ہیں اگر فی الواقع زبانی بھی کلمات بیع درمیان نہیں آتے نہ وہ کہتاہے کہ میں نے رس تیرے ہاتھ بیچا، نہ یہ کہتاہے کہ میں نے خریدا بلکہ اسی قسم کی گفتگو ہوتی ہے تو اسے بیع سے اصلا علاقہ نہیں، یہ تو ایک وعدہ واقرار ہے کہ زرمطالبہ اس راہ سے ادا کروں گا یہ صورت فی نفسہٖ اصلا جواز کی تھی، اگر کسی کا کسی پر کچھ قرض آتا ہو اورمدیون برضائے خود وعدہ کرلے کہ اس کے بدلے میں تجھے فلاں چیز اس نرخ سے دوں گا تو اس میں کوئی حرج نہیں جس وقت دے گا اس وقت بعوض اس قرض کے بیع ہوجائے گی اس طریقہ میں نہ پہلے سے کسی قرارداد کی حاجت ہوئی نہ کوئی شرط درکار، فقط اتنا چاہیے کہ دیتے وقت انہیں باہم معلوم ہوکہ اس بھاؤ پر دی گئی،