Brailvi Books
 |
فتاویٰ رضویہ جلد نمبر۱۷(کتاب البیوع، کتاب الحوالہ، کتاب الکفالہ ) |
141 - 180
اورا گر بیع رضامندی سے ہوئی مگر کوئی شرط رہ گئی مثلا غلہ کی جنس یا نوع یا صفت یا وزن کی تعیین نہ ہوئی یا وہ چیز ٹھہری جو اس وقت سے وقت وعدہ تک ہر وقت بازار میں موجود نہ رہے گی یا میعاد مجہول رکھی یا اسی جلسہ میں روپیہ تمام وکمال ادانہ کردیا تو ضرور حرام وسود ہے اگرچہ نرخ بازار سے کچھ زیادہ نہ ٹھہرا ہو اور اگر خرید وفروختم(میں نے خریدا میں نے فروخت کیا۔ ت)کا مضمون درمیان نہ آیا مثلا اس نے کہا کہ روپیہ کے چودہ سیر لیں گے اس نے کہا دوں گا تو یہ نہ سود ہے نہ حرام، نہ اس کے لئے کسی وجہ شرط کی حاجت، نہ اسے اس پر مطالبہ پہنچے، اس کی خوشی پر ہے چاہے دے یا نہ دے کہ یہ سرے سے بیع ہی نہ ہوئی نرا وعدہ ہوا۔ واللہ تعالٰی اعلم۔
مسئلہ ۲۳۴ تا ۲۳۵: از گھٹنگاہ میو بند باغات ضلع جورہاـٹ آسام مسئولہ عبیداللہ ۱۷ رمضان ۱۳۳۹ھ کیا فرماتے ہیں علمائے دین کہ: (۱) زید نے بکر کو دو روپے دئے اور غلہ کا دینا بروقت درو زراعت بہ تعیین وزن مثلا فی روپیہ کا بیس سیردھان، اور حال یہ ہے کہ اس وقت بازار کے نرخ سے دوچند ہوتاہے اب یہ بیع شرعاجائز ہے یانہیں ؟ (۲) زید نے دس بیگھ زمین خرید کر زراعت کار کو خزانہ پر دیا ہے مگر خزانہ کاروپیہ نقد نہیں وصول کیا یہ بندوبست کیا کہ جب خزانہ کاروپیہ کے ہر روپیہ میں بعد درو زراعت بیس روپے کرکے دھان لوں گا اب یہ بھی نرخ بازار سے دوچند ہوتاہے۔ یہ شرعا جائزہے یانہیں ؟
الجواب: (۱) یہ صورت بیع سلم کی ہے اگراس کی سب شرطیں ادا ہولیں جائز ہے ورنہ حرام منجملہ ان شرائط کے میعاد معلوم ہو کہ ایک مہینہ سے کم نہ ہو اور وقت درومیعاد غیر معلوم ہو کہ آگے پیچھے ہوتارہتاہے لہذا صورت مذکور ناجائز وحرام ہوئی
، درمختارمیں ہے: